കാന്പൂര് : എട്ടു പോലീസുദ്ധ്യോഗസ്ഥരെ കൊലപ്പെടുത്തിയ കുപ്രസിദ്ധ ഗുണ്ടാ നേതാവ് വികാസ് ദുബെയുടെ പ്രവര്ത്തന ശൈലി കമ്യൂണിസ്റ്റ് ഭീകരരുടേതെന്ന് ഉത്തര് പ്രദേശ് പോലീസ്. വന് ആയുധശേഖരങ്ങളും അനുയായികളും പ്രത്യേക വാഹനവ്യൂഹവുമായിട്ടാണ് ദുബെ എന്നും സഞ്ചരിച്ചിരുന്നതെന്നാണ് അന്വേഷണ സംഘം കണ്ടെത്തിയിരിക്കുന്നത്. ഇടിച്ചു തകര്ത്ത ദുബെയുടെ വീട്ടിനകത്തുനിന്നും നിരവധി തോക്കുകളും സ്ഫോടകവസ്തുക്കളും പിടിച്ചെടുത്തു.
വീടിനടിയില് പ്രത്യേകം തയ്യാറാക്കിയ ഭൂഗര്ഭ അറകളിലാണ് ആയുധങ്ങളും സ്ഫോടക വസ്തുക്കളും സൂക്ഷിച്ചിരുന്നത്. പിടിച്ചെടുത്തവയില് 6 തോക്കുകളും 25 റൗണ്ടിനുള്ള തിരകളും, രണ്ടു കിലോ സ്ഫോടകവസ്തുക്കളുമാണ് കണ്ടെത്തിയത്. ദുബെയുടെ അനുയായികളുടെ പേരിലാണ് തോക്കുകളുടെ ലെസന്സുകളെടുത്തിരിക്കുന്നതെന്നും പോലീസ് പറഞ്ഞു.
പോലീസുകാര്ക്കിടയില് സ്ഥിരം അനുയായികളെ കടത്തിവിട്ടിരുന്ന ദുബെയ്ക്കായി വിവരം ചോര്ത്തുന്ന 20 പോലീസുകാരുടെ തെളിവുകളും ശേഖരിച്ചതായി കാന്പൂര് ഐ.ജി. മോഹിത് അഗര്വാള് പറഞ്ഞു. സംസ്ഥാനത്തെ 75 ജില്ലകളിലും ദുബെയ്ക്കായി തിരച്ചില് നടക്കുകയാണ്. ഒപ്പം ദുബെയുടെ വിവിധ പ്രദേശത്തെ രഹസ്യകേന്ദ്രങ്ങളും സഹായിക്കുന്നവരുടെ വിവരങ്ങളും പോലീസ് ശേഖരിച്ചു വരികയാണ്. 3000 പോലീസുകാരടങ്ങുന്ന 50 സംഘത്തെയാണ് അന്വേഷണത്തിനായി നിയോഗിച്ചിരിക്കുന്നത്.
