ലണ്ടന്‍: ലിവര്‍പൂളിന് ഗംഭീര ജയം. ഇംഗ്ലീഷ് പ്രീമിയര്‍ ലീഗ് അവസാനമത്സരങ്ങളിലേയ്‌ക്ക് അടുക്കുമ്പോള്‍ ചാമ്പ്യന്‍മാരായിക്കഴിഞ്ഞ ലിവര്‍പൂള്‍ ഗോള്‍ നിറച്ച് മുന്നേറുകയാണ്. ഇന്നലെ നടന്ന മത്സരത്തില്‍ ബ്രൈറ്റണെ ഒന്നിനെതിരെ മൂന്ന് ഗോളുകള്‍ക്കാണ് ക്ലോപ്പിന്റെ ടീം തോല്‍പ്പിച്ചത്. ആമെക്‌സ് സ്റ്റേഡിയത്തില്‍ നടന്ന മത്സരത്തിലാണ് ലിവര്‍പൂള്‍ 34-ാം മത്സരത്തില്‍ തകര്‍പ്പന്‍ ജയം നേടിയത്.
മുന്നേറ്റ നിരയിലെ സൂപ്പര്‍താരം മുഹമ്മദ് സലയുടെ ഇരട്ട ഗോളാണ് ലിവര്‍പൂളിന്റെ ജയ ത്തിലെ സവിശേഷത. കളിയുടെ 6-ാം മിനിറ്റില്‍ത്തന്നെ സലായുടെ ഗോള്‍ എതിരാളികളുടെ വല ഭേദിച്ചു. തുടര്‍ന്ന് രണ്ടു മിനിറ്റിനകം 8-ാം മിനിറ്റില്‍ ലിവര്‍പൂള്‍ നായകന്‍ ഹെന്‍ഡേഴ്‌ സണും തന്റെ പ്രതിഭ തെളിയിച്ചു. ആദ്യ പകുതിയുടെ അവസാന നിമിഷം ബ്രൈറ്റണ്‍ ഒരു ഗോള്‍ മടക്കുന്നതില്‍ വിജയിച്ചു. ട്രോസ്സാഡാണ് ആതിഥേയര്‍ക്കായി ഗോള്‍ നേടിയത്. എന്നാല്‍ കളിയുടെ 76-ാം മിനിറ്റില്‍ മുഹമ്മദ് സലയുടെ വക ജയം ആധികാരികമാക്കിയ ഗോള്‍ വീണു. സീസണില്‍ 19-ാം ഗോളുകള്‍ നേടി സല മികച്ച ഫോം നിലനിര്‍ത്തുകയാണ്. ജയത്തോടെ 34 മത്സരങ്ങളിലായി ലിവര്‍പൂളിന് ലീഗില്‍ 92 പോയിന്റുകളായി. മാഞ്ചസ്റ്റര്‍ സിറ്റിയുടെ റെക്കോഡായ 100 പോയിന്റുകള്‍ എന്ന നേട്ടമാണ് ലിവര്‍പൂള്‍ ലക്ഷ്യമിടുന്നത്.
