ഒരിക്കലെങ്കിലും എക്കിള്‍ വരാത്തവരായി ആരും ഉണ്ടാകാറില്ല. എല്ലാവരിലും ഉണ്ടാകുന്ന ഒരു സ്വാഭാവിക ശാരീരിക പ്രവര്‍ത്തനമാണ് എക്കിള്‍. തൊണ്ടയ്‌ക്ക് താഴെ ഡയഫ്രത്തിലെ പേശികള്‍ പെട്ടെന്ന് ചുരുങ്ങുമ്പോള്‍ ഒരു പ്രത്യേക ശബ്ദത്തോടെ ഉണ്ടാകുന്ന അവസ്ഥയാണ് എക്കിള്‍. എക്കിള്‍ നിയന്ത്രിക്കാന്‍ ബുദ്ധിമുട്ടാണ്. തൊണ്ടയുടെ ചില ഭാഗങ്ങള്‍ അടയ്‌ക്കുകയും ചെയ്യും.
പലകാരണങ്ങള്‍ കൊണ്ടും എക്കിള്‍ ഉണ്ടാകാറുണ്ട്. മാനസിക സമ്മര്‍ദ്ദം മൂലവും ഭക്ഷണം വേണ്ടത്ര ചവച്ചരയ്‌ക്കാതെ കഴിക്കുന്നത് കൊണ്ടും അമിതാഹാരം കൊണ്ടും എക്കിള്‍ വരാം. പക്ഷാഘാതവും ബ്രെയിന്‍ ട്യൂമറും ചില മരുന്നുകളോടുള്ള അലര്‍ജിയുമെല്ലാം പലപ്പോഴും തുടര്‍ച്ചയായ എക്കിളിന് കാരണമാകാറുണ്ട്. വളരെ ചുരുങ്ങിയ സമയത്തേക്ക് മാത്രമെ എക്കിള്‍ നീണ്ടു നില്‍ക്കാറുള്ളെങ്കിലും പലപ്പോഴും ഇത് നമുക്ക് വളരെ അസ്വസ്ഥതകള്‍ ഉണ്ടാക്കും. എക്കിളില്‍ നിന്നും ആശ്വാസം നേടാനായി പ്രയോഗിക്കേണ്ട പൊടിക്കൈകള്‍ എന്തൊക്കെയാണെന്ന് നോക്കാം.
1. ശ്വാസം പിടിച്ചു പതുക്കെ അയച്ചു വിടുന്ന ബ്രെത്ത് എക്‌സര്‍സൈസ് ചെയ്യുന്നത് എക്കിള്‍ മാറാനുള്ള ഏറ്റവും പ്രാഥമികമായതും വളരെ പൊതുവായതുമായ വഴിയാണ്.
2. എക്കിള്‍ വരുന്ന സമയത്ത് ഇളം ചൂടുള്ള വെള്ളം അല്‍പ്പം കുടിക്കുന്നത് എക്കിളിന് ആശ്വാസം നല്‍കും. ശിരസില്‍ നിന്നും ഉദര ഭാഗത്തേക്ക് വരുന്ന ചില ഞരമ്പുകളെ ഉത്തേജിപ്പിക്കാന്‍ ഇളം ചൂടുള്ള വെള്ളം കുടിക്കുന്നത് വഴി സാധിക്കും. വെള്ളം സാവധാനം കുടിക്കാന്‍ ശ്രദ്ധിക്കണം.
3. പഞ്ചസാര നാവില്‍ വെച്ച് പതുക്കെ അലിയിച്ച് കഴിക്കുന്നതും എക്കിള്‍ മാറാന്‍ ഫലപ്രദമാണ്.
4. തേനും നെയ്യും ചേര്‍ത്ത് കഴിക്കുന്നതും നെയ്യും കായപ്പൊടിയും ചേര്‍ത്ത് കഴിക്കുന്നതും എക്കിള്‍ മാറാനുള്ള പരിഹാരമാണ്. നെയ്യും ഇന്തുപ്പും ചേര്‍ത്ത് കഴിക്കുന്നതും നല്ലതാണ്.
5. ചെറുനാരങ്ങാ നീര് കഴിക്കുന്നതും എക്കിളിന് പരിഹാരം നല്‍കും. ചെറുനാരങ്ങയുടെ സവിശേമായ ഗന്ധത്തോടെയുള്ള പുളിരുചി മൂക്കിന്റെ മുകള്‍ ഭാഗത്തെ അതിലോലമായ പേശികളെ പെട്ടെന്ന് ഉത്തേജിപ്പിക്കുകയും അതിന്റെ ഫലമായി ഡയഫ്രത്തിന് അനുഭവപ്പടുന്ന അസ്വസ്ഥത ഇല്ലാതാകുകയും എക്കിളിന് ആശ്വാസം ലഭിക്കുകയും ചെയ്യും.
