ന്യൂഡല്ഹി: ബി.സി.സി.ഐ കേസ്സ് വാദം കേള്ക്കുന്നത് സുപ്രീംകോടതി രണ്ടാഴ്ചത്തേയ്ക്ക് മാറ്റി. ലോധ കമ്മറ്റി റിപ്പോര്ട്ടില് ഭേദഗതി ആവശ്യപ്പെട്ടുകൊണ്ടാണ് ക്രിക്കറ്റ് ബോര്ഡ് സുപ്രീംകോടതിയെ സമീപിച്ചത്. നിലവിലെ ഭാരവാഹികളെ പ്രത്യേക സാഹചര്യം പരിഗണിച്ച് അടുത്ത കാലവധിയിലും തുടരാന് അനുവദിക്കണമെന്നതായിരുന്നു ആവശ്യം. നിലവില് അധ്യക്ഷന് സൗരവ് ഗാംഗുലി, ജയ് ഷാ. ജയേഷ് ജോര്ജ്ജ് എന്നിവരടക്കമുള്ളവര്ക്ക് ലോധ റിപ്പോര്ട്ട് പ്രകാരം തുടരാനാകില്ല.
ബി.സി.സി.ഐ അധ്യക്ഷ സ്ഥാനത്തേയക്ക് പരിഗണിച്ച ശേഷം സൗരവ് ഗാംഗുലിയുടെ പ്രവര്ത്തനം ഏറെ പ്രശംസ പടിച്ചുപറ്റിയിരുന്നു. എന്നാല് നിബന്ധന പ്രകാരം 6 വര്ഷത്തിന് ശേഷം 3 വര്ഷം ഒരു ചുമതലയും വഹിക്കരുതെന്ന നയവും നിലവിലെ ഭാരവാഹികള്ക്ക് തടസ്സമാണ്. 2019ലാണ് ഗാംഗുലിയും ജയ് ഷായും ചുമതലയേറ്റത്. ഈ വരുന്ന 27-ാം തീയതിയാണ് ഗാംഗുലിയുടെ കാലാവധി അവസാനിക്കുന്നത്. ജയ് ഷായുടേത് ഈ മാസം അവസാനവും ജയേഷിന്റെ കാലാവധി സെപ്തംബര് 23നുമാണ് അവസാനിക്കുക. ഇതിനിടെ ബീഹാര് അസോസിയേഷനും ഐ.പി.എല്ലിനെതിരെ വാതുവെയ്പ്പു കേസ് കൊടുത്ത ആദിത്യ വെര്മയും ഗാംഗുലിയ്ക്ക് പിന്തുണയുമായി എത്തിയിട്ടുണ്ട്.
നിരവധി പ്രതിന്ധികളിലൂടെ കടന്നുപോകുന്നതിനാല് ക്രിക്കറ്റിലെ മാറ്റങ്ങള്ക്കായി നിലവിലെ ഭരണസമിതിക്ക് തുടരാനുള്ള അനുമതി നല്കണമെന്നാണ് ബി.സി.സി.ഐ കോടതിയില് ആവശ്യപ്പെട്ടിരിക്കുന്നത്. കൊറോണ പ്രതിസന്ധി കണക്കിലെടുത്ത് കോടതി വിധി അനുകൂലമാകുമെന്നാണ് കരുതുന്നത്. പ്രതിന്ധിയിലായ ഐ.പി.എല്ലിന്റെ നടത്തിപ്പിലും ഉടനെയുള്ള ഭാരവാഹിമാറ്റം ബാധിക്കുമെന്നാണ് വിലയിരുത്തല്.
