മഴക്കാലത്തെ ചർമ്മ സംരക്ഷണത്തിനായി ചില നുറുങ്ങു വിദ്യകൾ

വേനൽക്കാലത്താണ് നാം ഏറ്റവും കൂടുതൽ ചർമ്മ സംരക്ഷണത്തെ കുറിച്ച് ആകുലപ്പെടാറുള്ളത് . പൊടിയിൽ നിന്നും , വെയിലിൽ നിന്നും , അമിതമായുണ്ടാകുന്ന വിയർപ്പിൽ നിന്നും ചർമ്മത്തിന് ഉണ്ടാകുന്ന ബുദ്ധിമുട്ടുകൾ പരിഹരിക്കാൻ പല മാർഗ്ഗങ്ങളും നമ്മൾ പരീക്ഷിക്കാറുണ്ട്. വേനൽക്കാലത്തെ അപേക്ഷിച്ചു മഴക്കാലം പൊതുവെ സുഖകരമായ കാലാവസ്ഥയാണ് . എന്നിരുന്നാലും ചർമ്മത്തിന് മഴക്കാലത്തും സംരക്ഷണം നല്കുക തന്നെ വേണം .

മഴക്കാലത്ത് അന്തരീക്ഷത്തിലെ ഊഷ്മാവിനും താപനിലക്കും വ്യതിയാനങ്ങൾ ഉണ്ടാകുന്നു. അതിനാൽ തന്നെ ഈ മാറ്റങ്ങൾ നമ്മുടെ ചർമ്മത്തെ ബാധിക്കുകയും , പലതരത്തിലുള്ള അസുഖങ്ങൾ വരാനുള്ള സാധ്യതയും വർധിപ്പിക്കുന്നു . ഇതൊഴിവാക്കാനായി ചില നുറുങ്ങു വിദ്യകൾ ശീലമാക്കുന്നത് വളരെയധികം പ്രയോജനം ചെയ്യും

1 . ദിനവും എട്ട് മുതൽ പത്തു ഗ്ലാസ് വെള്ളം വരെ കുടിക്കാൻ ശ്രദ്ധിക്കുക. നിങ്ങളുടെ ചർമ്മത്തിന്റെ തിളക്കവും മിനുസവും നിലനിർത്താൻ ഇത് സഹായിക്കും .

2 . കുളിക്കാനും , ശരീരത്തിൽ പുരട്ടാനുപയോഗിക്കുന്ന ക്രീമുകളിലും ടീ ട്രീ ഓയിൽ , കറ്റാർ വാഴ , നാരങ്ങ സത്ത് , വേപ്പ് , തുളസി , തേൻ എന്നിവയുടെ സാന്നിധ്യം ഉറപ്പ് വരുത്തുക. ആന്റിബാക്റ്റീരിയൽ , ആന്റിഫങ്കൽ ക്രീമുകളും പൗഡറും കയ്യിൽ കരുതാൻ ശ്രദ്ധിക്കുക .

3 . മഴ നനയാനുള്ള സാഹചര്യം ഉണ്ടായാൽ , ചെറു ചൂട് വെള്ളത്തിൽ കുളിക്കാൻ ശ്രദ്ധിക്കുക. ഒരുപാട് ചൂട് കൂടിയ വെള്ളം ഒഴിവാക്കുക , ഇത് നിങ്ങളുടെ ചർമ്മത്തിന്റെ കോശങ്ങളെ ദുർബലപ്പെടുത്തുകയും നശിപ്പിക്കുകയും ചെയ്യുന്നു .

4 . ചർമ്മത്തിലെ എണ്ണമയം അകറ്റാൻ ആഴ്ചയിൽ ഒന്നെങ്കിലും ഓട്സ് , തൈര് , തേൻ ചേർത്തുണ്ടാക്കിയ മിശ്രിതമോ , ബദാമും തേനും ചേർത്തുണ്ടാക്കിയ മിശ്രിതമോ , കടലമാവ് , തേൻ, നാരങ്ങാ നീര് , പാല് എന്നിവ ചേർത്തുണ്ടാക്കിയ മിശ്രിതമോ മുഖത്തു പുരട്ടി നന്നായി ഉരച്ചു കഴുകുക . ഇത് ചർമ്മത്തിൽ അടങ്ങിയിരിക്കുന്ന നിർജീവമായ കോശങ്ങളെയും അഴുക്കിനെയും നീക്കി, ചർമ്മത്തിന് തിളക്കവും മിനുസവും പ്രധാനം ചെയ്യുന്നു .

5 . മഴക്കാലത്ത് പാർലറുകളിൽ പോയുള്ള ഫേഷ്യൽ ഒഴിവാക്കുകയാണ് നല്ലത് . പകരമായി വീട്ടിൽ തയ്യാറാക്കിയ പപ്പായ കൊണ്ടുള്ള ഫേസ് മാസ്ക് ഉപയോഗിക്കാവുന്നതാണ് . ഗ്ലിസറിൻ അടങ്ങിയ ടോണറുകൾ ഉപയോഗിക്കാൻ ശ്രദ്ധിക്കുക . പനിനീരും ചർമ്മസംരക്ഷണത്തിന് ഉത്തമമായ വസ്തുവാണ് .

6 . മഴക്കാലത്ത് പുറത്തു പോകുമ്പോൾ കഴിയുന്നതും മേയ്‌ക്കപ്പ് ഒഴിവാക്കുക .

മഴക്കാലത്ത് ഫങ്കസ് അല്ലെങ്കിൽ ബാക്ടീരിയ മൂലം ഉണ്ടാകുന്ന അണുബാധ ഒഴിവാക്കാനായി ചർമ്മം വൃത്തിയായും നനവില്ലാതെയും സൂക്ഷിക്കേണ്ടത് അത്യാവശ്യമാണ് . കോട്ടൺ വസ്ത്രങ്ങളേക്കാൾ സിന്തറ്റിക് വസ്ത്രങ്ങളാണ് മഴക്കാലത്ത് അനുയോജ്യം .