- മലയാളിയുടെ ഭക്ഷണങ്ങള്ക്ക് രുചി കൂട്ടുന്ന ഒരു രഹസ്യ ചേരുവയുണ്ട് മറ്റൊന്നുമല്ല നല്ല നാടൻ വെളിച്ചെണ്ണ. വെളിച്ചെണ്ണയില് കടുകും വറ്റല്മുളകും ഒരല്പ്പം കറിവേപ്പിലയും കൂടി ഇട്ടു താളിക്കുന്ന മണമായിരിക്കണം ഒരു മലയാളിയില് ഏറ്റവും ഗൃഹാതുരത്വം ഉണര്ത്തുന്ന വാസന . ഭക്ഷണത്തില് രുചികൂട്ടാന് മാത്രമല്ല സൗന്ദര്യ സംരക്ഷണത്തിലും മുന്പന്തിയില് ആണ് വെളിച്ചെണ്ണ .
നൂറ്റാണ്ടുകളായി നമ്മള് ഉപയോഗിക്കുന്ന ഒന്നാണ് വെളിച്ചെണ്ണ . സുശ്രുത സംഹിതയില് വെളിച്ചെണ്ണ ശരീരത്തിലെ ചൂട് കുറച്ചു ജലാംശം നിലനിര്ത്താന് നല്ലതാണെന്ന് പറയുന്നുണ്ട്. തലമുടിയുടെ വളര്ച്ചക്കും ഇത് അത്യുത്തമമാണ് . ശരീര കോശങ്ങളെ സംരക്ഷിക്കുക മാത്രമല്ല ശരീരത്തിലെ കൊഴുപ്പിനെ ഇല്ലാതാക്കി ശരീര ഭാരം കുറയ്ക്കാനും സഹായിക്കുന്നു.
ചില പഠനങ്ങള് വെളിച്ചെണ്ണയുടെ ഉപയോഗം ഹൃദ്രോഗത്തിന്റെ സാധ്യതകളെ കുറയ്ക്കുമെന്ന് പറയുന്നു. ശരീരത്തിലെ ഈര്പ്പം നിലനിര്ത്തൂം എന്നുള്ളതുകൊണ്ടു ചര്മ്മത്തില് ഇത് തേച്ച് പിടിപ്പിക്കുന്നതും നല്ലതാണ്. വെളിച്ചെണ്ണയില് കാണപ്പെടുന്ന ഫാറ്റി ആസിഡുകള്ക്ക് ശരീരത്തിലുള്ള ഉപദ്രവകാരികള് ആയ ബാക്ടീരിയകളെയും ഫംഗസുകളെയും തടയാനുള്ള ശക്തിയുണ്ട്. തലച്ചോറിന്റെ പ്രവര്ത്തനം വര്ദ്ധിപ്പിച്ചു ഓര്മശക്തി കൂട്ടുവാനും ഇത് സഹായിക്കും എന്നു പഠനങ്ങള് കണ്ടെത്തിയിരിക്കുന്നു. എന്തിനേറെ പറയുന്നു നമ്മുടെ പല്ലിന്റെ ആരോഗ്യത്തിനുപോലും വെളിച്ചെണ്ണ വളരെ നല്ലതാണ് .
ഇന്ന് ജനങ്ങളില് വ്യാപകമായി കാണപ്പെടുന്ന പ്രമേഹം പോലുള്ള രോഗങ്ങളെ പ്രതിരോധിക്കാനും വെളിച്ചെണ്ണയ്ക്ക് കഴിയും. കരളിന്റെ ആരോഗ്യത്തിനും ദഹനശേഷി വര്ദ്ധിപ്പിക്കാനും തുടങ്ങി വെളിച്ചെണ്ണ നമ്മുടെ ശരീരത്തിനു വേണ്ടി ചെയ്യുന്ന സേവനങ്ങള് വളരെ വലുതാണ്. തേങ്ങയില് നിന്നും നേരിട്ടെടുത്ത സംസ്കരിക്കാത്ത, വെന്ത വെളിച്ചെണ്ണ കുഞ്ഞുങ്ങളെ തേച്ച് കുളിപ്പിക്കാന് ഉപയോഗിക്കാറുണ്ടല്ലോ.
“പണ്ടുള്ളവര്ക്കൊക്കെ എന്തായിരുന്നു ഒരു ആരോഗ്യം ! ” എന്നു ദീര്ഘനിശ്വാസം ഉതിര്ക്കും മുന്പ് മേല്പറഞ്ഞതൊക്കെ ഒന്നു ആലോചിക്കണം . ഇന്ന് പല എണ്ണകളും തിളക്കമുള്ള പരസ്യത്തിന്റെ പുറം ചട്ട അണിഞ്ഞ് കടന്നുവന്നപ്പോള് മറ്റൊന്നും ആലോചിക്കാതെ നമ്മള് അവയെ അടുക്കളയിലേക്ക് കൂടെ കൂട്ടി . അപ്പോള് ക്ഷണിക്കപ്പെടാതെ തന്നെ ഒരുപാട് രോഗങ്ങളും നമ്മുടെ കൂടെ കൂടി . അപ്പോള് വെളിച്ചെണ്ണയെ കൂടി ഇടയ്ക്കു ഒന്നോര്ക്കാം.ആ പഴയ രുചികൾ വീണ്ടും തിരിച്ചു വരട്ടെ…
