ഇന്ത്യയിൽ നിന്ന് ജർമനിയിലേക്ക് മാതാപിതാക്കളെ കൊണ്ട് വന്നു മാസങ്ങൾക്കുള്ളിലാണ് അപൂർവ ഇനം ചുവന്ന പാണ്ട കുഞ്ഞു ജനിച്ചത് . ആറു വയസുള്ള ‘അമ്മ ഷൈനും , അഞ്ചു വയസുള്ള അച്ഛൻ ജോയലും ഇന്ത്യയിലെ ഡാർജീലിങ്ങിൽ ഉള്ള പദ്മജ നായിഡു ഹിമാലയൻ സുവോളജിക്കൽ പാർക്കിൽ നിന്ന് ജർമനിയിലേക്ക് കൊണ്ട് പോയവയാണ് .
ജർമനിയിലെ ടൈർപാർക് സൂവിൽ എത്തി പെട്ടെന്ന് തന്നെ രണ്ടു പേരും പരിസരവുമായി ഇണങ്ങി എന്നാണ് സൂ അധികൃതർ പറയുന്നത് . പുതിയതായി എത്തിയവ ആയതിനാൽ സൂവിലെ ജോലിക്കാരുമായി അധികം അടുപ്പം പുലർത്തിയിരുന്നില്ല ഇരു പാണ്ടകളും . അതിനാൽ തന്നെ ഷൈൻ ഗർഭിണിയാണെന്നുള്ള കാര്യം , പ്രതീക്ഷിക്കുന്നുണ്ടായിരുന്നുവെങ്കിലും സൂ അധികൃതർക്ക് അറിയില്ലായിരുന്നു . ജൂൺ ആറാം തീയതിയാണ് കുഞ്ഞിനെ ഷൈനിന്റെ ഗുഹയിൽ കണ്ടത് . ഗിനി പന്നിയുടെ വലിപ്പം മാത്രമാണുള്ളത് .
പുതിയ ഒരു പാണ്ട കുഞ്ഞു സൂവിൽ പിറന്നതിന്റെ ആഹ്ളാദത്തിലാണ് സൂ അധികൃതർ . അപകടമാം വിധം വംശ നാശം സംഭവിച്ചു കൊണ്ടിരിക്കുന്ന വർഗ്ഗമാണ് പാണ്ടകൾ . അതിനാൽ തന്നെ പാണ്ട കുഞ്ഞിന്റെ ജനനം അവയെ സംരക്ഷിക്കേണ്ടതിന്റെ ആവശ്യകതയെ കുറിച്ച് മാനവർക്കിടയിൽ ബോധവൽക്കരണം നടത്താൻ സഹായിക്കും എന്നാണ് കരുതുന്നത് .
കിഴക്കൻ ഹിമാലയത്തിലും, തെക്കു പടിഞ്ഞാറൻ ചൈനയിലുമാണ് ചുവന്ന പാണ്ടകളെ കാണാറുള്ളത്. ആഗോള പ്രജനനത്തിന്റെ ഭാഗമായി നടക്കുന്ന പരിപാടിയിൽ ഇതുവരെ പത്തു ചുവന്ന പാണ്ടകളാണ് ബെർലിനിലെ സൂവിൽ ഉള്ളത് . പേരിട്ടിട്ടില്ലാത്ത പാണ്ട കുഞ്ഞിനെ ഇതുവരെ കാണികൾക്കു മുന്നിൽ പ്രദർശിപ്പിക്കാൻ തുടങ്ങിയിട്ടില്ല. ഏകദേശം സെപ്റ്റംബറോടെ അമ്മയുടെ ഗുഹയിൽ നിന്ന് പുറത്തു വരും എന്ന് കരുതുന്ന കുഞ്ഞിനെ കാണികൾക്കു കാണാൻ സാധിക്കും .
