മാഞ്ചസ്റ്റര്: പാകിസ്താനെതിരായ ഒന്നാം ക്രിക്കറ്റ് ടെസ്റ്റില് ഇംഗ്ലണ്ടിനു തകര്പ്പന് ജയം. ആദ്യ മൂന്നു ദിവസവും ആധിപത്യം പുലര്ത്തിയ പാകിസ്താനെ ഞെട്ടിച്ചാണ് നാലാം ദിനത്തില് ഇംഗ്ലണ്ട് വിജയം പിടിച്ചെടുത്തത്. ഇതോടെ മൂന്നു മത്സരങ്ങളുടെ പരമ്പരയില് ഇംഗ്ലണ്ട് 1-0നു മുന്നിലെത്തി.
മൂന്നു വിക്കറ്റിനാണ് ആതിഥേയരായ ഇംഗ്ലീഷ് പട വിജയം സ്വന്തമാക്കിയത്. 277 റണ്സിന്റെ വിജയലക്ഷ്യം പിന്തുടര്ന്ന് രണ്ടാം ഇന്നിംഗ്സില് ബാറ്റിംഗിനിറങ്ങിയ ഇംഗ്ലണ്ട് 82.1 ഓവറില് 7 വിക്കറ്റ് നഷ്ടത്തില് വിജയലക്ഷ്യം മറികടന്നു. 84 റണ്സോടെ പുറത്താകാതെ നിന്ന ക്രിസ് വോക്സിന്റെയും ജോസ് ബട്ലറുടെയും (75) ഉജ്ജ്വല ഇന്നിംഗ്സുകളാണ് ഇംഗ്ലണ്ടിന്റെ വിജയത്തില് നിര്ണായകമായത്.
ആറാം വിക്കറ്റില് ഇരുവരും ചേര്ന്ന് നേടിയ 139 റണ്സാണ് മത്സരത്തിന്റെ ഗതി മാറ്റിമറിച്ചത്. ഒരു ഘട്ടത്തില് 5ന് 117 റണ്സെന്ന നിലയില് തകര്ന്ന ഇംഗ്ലണ്ടിനെ ബട്ലര്-വോക്സ് സഖ്യം നടത്തിയ രക്ഷാപ്രവര്ത്തനമാണ് വിജയിപ്പിച്ചത്.
സ്കോര്: പാകിസ്താന് 326, 169 ഇംഗ്ലണ്ട്: 219, 277/7
