ഉഷ്ണമേഖല പ്രദേശങ്ങളിൽ ധാരാളമായി ഉണ്ടാകുന്ന ഒന്നാണ് ഈന്തപ്പഴം . അതിനാൽ തന്നെ ഈന്തപ്പഴം എന്ന് കേൾക്കുമ്പോഴേ മനസ്സിലേക്ക് ഓടി വരുന്നത് ഗൾഫ് നാടുകളാണ് . ലോകത്തുടനീളം മുപ്പതിൽ പരം ഇനങ്ങളാണ് ഈന്തപ്പഴത്തിനുള്ളത് .ആരോഗ്യപരമായി ഒരുപാട് ഗുണങ്ങൾ ഉള്ള ഈന്തപ്പഴം ഇന്ന് വളരെയധികം പ്രചാരം നേടി കഴിഞ്ഞു . വിദേശ രാജ്യങ്ങളിൽ നിന്ന് വരുന്നവരുടെ കയ്യിൽ മാത്രം കണ്ടിരുന്ന വിശിഷ്ട ഫലം ഇന്ന് ഇന്ത്യൻ വിപണികളിൽ സുലഭമാണ് .
പഞ്ചസാരയുടെ വിവിധ രൂപങ്ങളായ സുക്രോസിന്റെയും , ഫ്രക്ടോസിന്റെയും , ഗ്ലുക്കോസിന്റെയും അളവുകളുടെ അടിസ്ഥാനത്തിൽ ഉണക്കിയ ഈന്തപ്പഴവും പഴുത്ത ഈന്തപ്പഴവും വിപണിയിൽ ലഭ്യമാണ് . നാരുകൾ , ആന്റി ഓക്സിഡന്റുകൾ , വിറ്റാമിനുകൾ , ധാതുക്കൾ എന്നിവ ധാരാളം അടങ്ങിയിരിക്കുന്നതിനാൽ ആരോഗ്യപരമായി ഒരുപാട് ഗുണങ്ങൾ ഉള്ള ഫലമാണ് ഈന്തപ്പഴം.
ധാരാളം നാരുകൾ അടങ്ങിയിരിക്കുന്നതിനാൽ മലബന്ധം ഉണ്ടാവാതിരിക്കുന്നതിനും , രക്തത്തിൽ ഉള്ള പഞ്ചസാരയുടെ അളവ് നിയന്ത്രിക്കാനും ഈന്തപ്പഴത്തിന് സാധിക്കും . വിവിധതരത്തിലുള്ള ആന്റി ഓക്സിഡന്റുകൾ അടങ്ങിയിരിക്കുന്നതിനാൽ ഹൃദ്രോഗം , അർബുദം , അൽഷിമേഴ്‌സ് എന്നിവയുടെ വ്യാപത്തി കുറക്കാൻ ഈന്തപ്പഴം കഴിക്കുന്നത് മൂലം സാധിക്കും .
ഗർഭാവസ്ഥയുടെ അവസാന നാളുകളിൽ ഈന്തപ്പഴം കഴിക്കുന്നത് സുഖ പ്രസവം നടക്കാൻ സഹായിക്കും എന്ന് പഠനങ്ങൾ പറയുന്നു . മധുരമുള്ള ഫലമായതിനാൽ പഞ്ചസാരയ്‌ക്ക് പകരമായി ചില പാചകകുറിപ്പുകളിൽ ഈന്തപ്പഴം ഉപയോഗിക്കുന്നത് പ്രമേഹ രോഗികൾക്ക് ഗുണം ചെയ്യും .
പൊട്ടാസിയത്തിന്റെ അളവ് കൂടുതലും സോഡിയത്തിന്റെ അളവ് കുറവായതും കാരണം നാഡീ സംബന്ധമായ അസുഖങ്ങൾ വരാതിരിക്കാൻ ഒരുപരിധി വരെ ഈന്തപ്പഴം കഴിക്കുന്നത് സഹായിക്കും . ഇരുമ്പിന്റെ സത്ത് അടങ്ങിയിരിക്കുന്നതിനാൽ വിളർച്ചക്കും ഈന്തപ്പഴം ഒരു പരിഹാരമാണ് .
ഈന്തപ്പഴത്തിൽ ഫ്ലൂറിൻ അടങ്ങിയിരിക്കുന്നതിനാൽ ദന്തസുരക്ഷക്കും ഗുണപ്രദമാണ് . കൊഴുപ്പിന്റെ അളവു ഈന്തപ്പഴത്തിൽ കുറവായതിനാൽ ശരീരഭാരം നിയന്ത്രിക്കാനും സഹായകമാകും .
