ന്യുഡല്ഹി: ദേശീയ തലത്തില് അതിവേഗ പാതകളുടെ വികസനവുമായി കേന്ദ്രസര്ക്കാര് മുന്നോട്ട്. അടുത്ത അഞ്ചു വര്ഷങ്ങള്ക്കുള്ളില് 23 പുതിയ എക്സ്പ്രസ്സ് ഹൈവേകള് പൂര്ത്തിയാക്കാനാണ് പദ്ധതി. രാജ്യത്തെ വാണിജ്യ-സാമ്പത്തിക ഇടനാഴിയുമായി ബന്ധപ്പെടുത്തിയാണ് 23 ദേശീയ അതിവേഗ പാതകളുടെ നിര്മ്മാണം പൂര്ത്തിയാക്കുക. മാര്ച്ച് 2025 ആണ് പദ്ധതികള് പൂര്ത്തിയാക്കാന് നിശ്ചയിച്ചിരിക്കുന്നത്. ഡല്ഹി-മുംബൈ, അഹമ്മദാബാദ്-ഡൊലേറാ, അമൃതസര്-ജാംനഗര് എന്നിവ 2023ല് തന്നെ പ്രവര്ത്തനക്ഷ മമാക്കുമെന്നും ഒന്പതെണ്ണം 2024ല് പൂര്ത്തിയാകുമെന്നും ദേശീയ പാതാ അതോറിറ്റി അറിയിച്ചു.
രാജ്യത്തെ ദേശീയപാതകള് ഹരിത മാനദണ്ഡങ്ങള് പാലിച്ചുള്ളവയാണെന്നും ഒന്പത് ദേശീയപാതകള് കൂടുതല് പരിഷ്ക്കരിച്ച ഹരിത മാനദണ്ഡങ്ങളോടെ 2025ല് പൂര്ത്തിയാകുമെന്നും ദേശീയപാത വികസന അതോറിറ്റി അറിയിച്ചു. എല്ലാ പദ്ധതികളും ചേര്ന്ന് 7800 കിലോമീറ്റര് ദൂരമാണ് ദേശീയ പാതകളാല് കോര്ത്തിണക്കപ്പെടുക. ആകെ ചിലവ് 3.3 ലക്ഷംകോടിരൂപയാണ് പ്രതീക്ഷിക്കുന്നത്. രാജ്യത്തെ പ്രധാനനഗരങ്ങളായ സൂറത്ത്, കോലാപ്പൂ്ര്, ലഖ്നൗ, വിസാഗ്, ചെന്നൈ, ബംഗളൂരു, വിജയവാഡ, റായ്പൂര്, കോട്ട, കരാഗ്പൂര്, സിലിഗുരി എന്നിവ വഴി അതിവേഗ പാത കടന്നുപോകും. ഇതില് 1350 കിലോമീറ്റര് ദൂരമുള്ള ഡല്ഹി-മുംബൈ പാതയാണ് ഏറ്റവും നീളമേറിയത്.
