- ‘അമ്മ കറുമ്പി മോളു വെളുമ്പി മോളുടെ മോളൊരു സുന്ദരിക്കോത’ എന്ന കടങ്കഥ അറിയാത്തവരായി ആരുമുണ്ടാകില്ല. എന്നാല്‍ ഈ കടങ്കഥയുടെ ഉത്തരമായ വെള്ളിലയുടെ ഗുണങ്ങളെക്കുറിച്ചും അത് ഉപയോഗിക്കേണ്ട രീതിയെക്കുറിച്ചും അറിയാത്തവരായി ചിലരെങ്കിലും ഉണ്ടാകും. നാട്ടിന്‍ പുറങ്ങളില്‍ വളരെ സുലഭമായി കാണാവുന്ന ഒരു ചെടിയാണ് വെള്ളില. മുടിയുടെ ഭൂരിഭാഗം പ്രശ്‌നങ്ങള്‍ക്കും പരിഹാരം കാണാന്‍ വെള്ളിലയ്‌ക്ക് സാധിക്കും. വിപണിയില്‍ നിന്നും ലഭിക്കുന്ന ഉല്‍പ്പന്നങ്ങളും എണ്ണയും വാങ്ങി ഉപയോഗിക്കുന്നതിലൂടെ സമയനഷ്ടവും സാമ്പത്തിക നഷ്ടവും മാത്രമാണ് ലഭിക്കുന്നത്.
എന്നാല്‍ നമുക്കുചുറ്റുമുള്ള നാടന്‍ മരുന്നുകള്‍ ഉപയോഗിക്കുമ്പോള്‍ മുടിക്ക് ഗുണം മാത്രമേ വരുകയുള്ളൂ. താരന്‍, മുടികൊഴിച്ചില്‍, അകാലനര, മുടിയുടെ അറ്റം പിളരുന്നത്, ബല കുറവ് മൂലം ഉണ്ടാകുന്ന പൊട്ടല്‍ തുടങ്ങി മുടിയുടെ ഏതൊരു പ്രശ്‌നത്തിനും പരിഹാരമാണ് വെള്ളില.
വെള്ളില കൂടുതലായും ആളുകള്‍ ഉപയോഗിക്കുന്നത് താളിയാക്കിയാണ് എന്നാല്‍ ഇതിലും ഫലവത്തായ രീതിയില്‍ വെള്ളില നമുക്ക് പ്രയോജനപ്പെടുത്താം. വെളളിലയില്‍ വെള്ളയും പച്ചയും നിറത്തിലുള്ള ഇലകള്‍ കാണാം ഇതില്‍ പച്ച നിറത്തിലുള്ള ഇലകളാണ് ഉപയോഗിക്കേണ്ടത്.
പച്ച ഇലകള്‍ ഇടിച്ചു പിഴിഞ്ഞ് നീരെടുത്ത് ശേഷം തലയോട്ടിയില്‍ നന്നായി തേച്ചുപിടിപ്പിക്കുക അരമണിക്കൂറിനു ശേഷം കഴുകി കളയുക. ഇങ്ങനെ ദിവസവും ചെയ്യുന്നതിലൂടെ മുടിയുടെ ആരോഗ്യത്തിനും പല വിധത്തിലുളള പ്രശ്‌നങ്ങള്‍ക്കും ഒരുപോലെ പരിഹാരം കാണാന്‍ സാധിക്കുന്നു.
തൊടികളിലും പറമ്പുകളിലും കാടുപോലെ പോലെ പടര്‍ന്നു കിടക്കുന്ന മുസാണ്ടയുടെ വര്‍ഗ്ഗത്തില്‍ പെട്ട ഒന്നാണ് വെള്ളില. ഇത് നിത്യേന താളിയായി ഉപയോഗിക്കുന്നതും വളരെ നല്ലതാണ്. തലയ്‌ക്ക് തണുപ്പ് ലഭിക്കുന്നതിനും നന്നായി ഉറക്കം ലഭിക്കുന്നതിനും വെള്ളിലത്താളി ഉപയോഗിക്കുന്നത് ഗുണം ചെയ്യുന്നു.
