ന്യൂഡല്ഹി: കേന്ദ്ര മാനവ വിഭവശേഷി വകുപ്പിന്റെ പേര് വിദ്യാഭ്യാസ വകുപ്പെന്ന് മാറ്റിയതിന് രാഷ്ട്രപതി രംനാഥ് കോവിന്ദ് അംഗീകാരം നല്കി. കേന്ദ്ര സര്ക്കാറിന്റെ കാബിനറ്റെടുത്ത തീരുമാനത്തിനാണ് രാഷ്ട്രപതിയുടെ ഔദ്യോഗിക അംഗീകാരം ലഭിച്ചിരിക്കുന്നത്. ദേശീയ വിദ്യാഭ്യാസ നയം പരിഷ്ക്കരിക്കുന്നതുമായി ബന്ധപ്പെട്ട തീരുമാനം അറിയിച്ചതിന് പിന്നാലെയാണ് കേന്ദ്രസര്ക്കാര് മാനവവിഭവശേഷി വകുപ്പിന്റെ പേരുമാറ്റവും അറിയിച്ചത്. കേന്ദ്രസര്ക്കാറിലെ ഒരു സുപ്രധാനവകുപ്പിന്റെ പേരുമാറ്റവുമായി ബന്ധപ്പെട്ട ചട്ടങ്ങള നുസരിച്ച് ഗസറ്റ് വിജ്ഞാപനവും പുറത്തിറക്കിയിരുന്നു. രാഷ്ട്രപതിയുടെ തീരുമാനവും ഗസറ്റ് വിജ്ഞാപനത്തില് സൂചിപ്പിച്ചിട്ടുണ്ടെന്നും വിദ്യാഭ്യാസ വകുപ്പറിയിച്ചു.
ജൂലൈ 29-ാം തീയതിയാണ് കേന്ദ്രസര്ക്കാര് 32 വര്ഷങ്ങള്ക്ക് ശേഷമുള്ള മാറ്റം വിദ്യാഭ്യാസ നയത്തില് വരുത്തിയത്. 6 വര്ഷത്തോളം വിദ്യാഭ്യാസ രംഗത്തെ മാറ്റങ്ങളെ സംബന്ധിച്ച് ഘട്ടംഘട്ടമായി നടത്തിയ ചര്ച്ചകള്ക്കും വിദഗ്ധ സമിതികളുടെ പഠനങ്ങള്ക്കും ശേഷമാണ് കാതലായ മാറ്റം നരേന്ദ്രമോദി സര്ക്കാര് കൊണ്ടുവന്നത്. 2019 മെയ്മാസം 31നാണ് അവസാന റിപ്പോര്ട്ട് ഗവേഷണ സമിതി കേന്ദ്രസര്ക്കാറിന് സമര്പ്പിച്ചത്.
മൂന്നാം വയസ്സുമുതലുള്ള വിദ്യാഭ്യാസം 18-ാം വയസ്സുവരെ നടത്തുന്ന 5-3-3-4 എന്ന നിലയിലാണ് ഇനി രാജ്യത്താകമാനം വിദ്യാഭ്യാസ പദ്ധതി നടക്കുക. തീരുമാനം വിദ്യാഭ്യാസ മന്ത്രി രമേശ് പൊഖ്റിയാലാണ് പ്രഖ്യാപിച്ചത്. തുടര്ന്ന് പ്രധാനമന്ത്രി നരേന്ദ്രമോദി വിദ്യാഭ്യാസ രംഗത്ത് മാറ്റമുണ്ടാകേണ്ടതിന്റെ അനിവാര്യതയെക്കുറിച്ചും രാജ്യം വരുത്തേണ്ട മാറ്റത്തെക്കുറിച്ചും തന്റെ അഭിസംബോധനയിലൂടെ വ്യക്തമാക്കിയിരുന്നു.
Comments