ബാഴ്സലോണ: ചാമ്പ്യന്സ് ലീഗ് ക്വാര്ട്ടര് ഫൈനലിലേറ്റ കനത്ത പരാജയത്തിനു പിന്നാലെ അടിമുടി മാറ്റത്തിനൊരുങ്ങി ബാഴ്സലോണ. ക്വീകെ സെറ്റിയന് ഇനി പരിശീലകനല്ലെന്ന് ബാഴ്സലോണ ഔദ്യോഗികമായി അറിയിച്ചു. ഇതിനു പിന്നാലെയാണ് മുന് ബാഴ്സ താരവും നിലവില് നെതര്ലന്ഡ്സ് പരിശീലകനുമായ റൊണാള്ഡ് കോമാന് ടീമിന്റെ പുതിയ പരിശീലകനായേക്കുമെന്ന റിപ്പോര്ട്ടുകള് പുറത്തുവരുന്നത്.
ബാഴ്സയെ പരിശീലിപ്പിക്കാനുള്ള ചുമതല ഏറ്റെടുക്കാന് കോമാന് സമ്മതിച്ചതായും നെതര്ലന്ഡ്സിന്റെ പരിശീലക സ്ഥാനത്തുനിന്ന് കാലാവധി തികയും മുന്പ് ഒഴിയേണ്ടിവരുമ്പോള് നല്കേണ്ട നഷ്ടപരിഹാരത്തുക സ്പാനിഷ് ക്ലബ്ബ് നല്കുമെന്നും സ്കൈ സ്പോര്ട്സ് റിപ്പോര്ട്ട് ചെയ്യുന്നു. ടീമിനെ വലിയ തോതില് ഉടച്ചുവാര്ക്കുമെന്നും അതിലേക്കുള്ള ആദ്യ ചുവടായാണ് പരിശീലകനെ മാറ്റുന്നതെന്നും ബാഴ്സ പത്രക്കുറിപ്പില് അറിയിച്ചിട്ടുണ്ട്.
1989 മുതല് 1995 വരെ കളിക്കാരനായും 1998-99 കാലയളവില് സഹ പരിശീലകനായും ബാഴ്സലോണക്കൊപ്പമുണ്ടായിരുന്ന കോമാന് തങ്ങളുടെ ടീമിന്റെ ഫുട്ബോള് ശൈലിക്ക് ചേര്ന്ന പരിശീലകനാണെന്നാണ് ബാഴ്സ മാനേജ്മെന്റിന്റെ വിലയിരുത്തല്. ആറു വര്ഷം ബാഴ്സക്കു വേണ്ടി ബൂട്ടുകെട്ടിയ അദ്ദേഹം 67 ഗോളടിച്ചു. പ്രതിരോധത്തിലും മിഡ് ഫീല്ഡിലുമായിരുന്നു ചുമതലയെങ്കിലും ആക്രമണത്തിലും കോമാന് ഒട്ടും മോശമായിരുന്നില്ല. ബാഴ്സ ഒരു യൂറോപ്യന് കിരീടം ആദ്യമായി നേടിയ 1992-ല് ഫൈനലിലെ നിര്ണായക ഗോള് നേടിയത് കോമാനായിരുന്നു.
