തുമ്പപ്പൂ എന്ന് കേൾക്കുമ്പോഴേ ഓർമ്മയിലേക്ക് ഓടി വരുന്നത് ഓണവും പൂക്കളവുമൊക്കെയാണ് . ഓണപ്പൂക്കളം ഒരുക്കുന്നതിൽ പ്രധാനിയായ തുമ്പപ്പൂ തൃക്കാക്കരയപ്പന് ഏറ്റവും ഇഷ്ടപെട്ട പുഷ്പം ആണെന്നും അതിനാൽ തന്നെ തുമ്പപ്പൂ വിനയത്തിന്റെ പ്രതീകമാണെന്നും കരുതി പോരുന്നു .
കേരളത്തിലെ തൊടികളിൽ വ്യാപകമായി കണ്ടു വരുന്ന സസ്യമാണ് തുമ്പ . കർക്കിടകമാസത്തിൽ തഴച്ചു വളരുന്ന തുമ്പ ചിങ്ങമാസം ആകുമ്പോഴേക്കും പൂവിട്ടു തുടങ്ങുന്നു . ചെറിയ പൂവുകളോട് കൂടി നിൽക്കുന്ന തുമ്പ ഔഷധ ഗുണങ്ങൾ ഏറെയുള്ള സസ്യം കൂടിയാണ് . പ്രധാനമായും മൂന്നു തരത്തിലുള്ള തുമ്പയാണ് കേരളത്തിൽ കണ്ടു വരുന്നത് . കരിന്തുമ്പ , പെരുന്തുമ്പ , തുമ്പ എന്ന പേരിലാണ് ഇവ അറിയപ്പെടുന്നത് .
ഔഷധ ഗുണങ്ങൾ ഏറെയുള്ള തുമ്പ ആയുർവേദ മരുന്നുകളിലെ ഒരു പ്രധാന ചേരുവയാണ് . തുമ്പയുടെ ഇലയും തണ്ടും പൂവും എല്ലാം തന്നെ ഔഷധ ഗുണം ഉള്ളവയാണ് . തുമ്പയുടെ ഇലകളിൽ ഗ്ലുക്കോസൈഡും , പുഷ്പങ്ങളിൽ ആൽക്കലോയിഡും അടങ്ങിയിരിക്കുന്നതിനാൽ ആണ് ഇവ ഏറെ ഗുണപ്രദമാകുന്നത് .
തുമ്പപ്പൂ പാലിൽ ചേർത്ത് കഴിക്കുന്നത് കുട്ടികളിലെ വിരശല്യം അകറ്റാൻ നല്ലൊരു മരുന്നാണ് . കൂടാതെ വയറുവേദനക്കും , ഉദരസംബന്ധമായ പ്രശ്നങ്ങൾക്കും നല്ലൊരു ഔഷധമാണ് തുമ്പ .തുമ്പ ഇട്ടു തിളപ്പിച്ച വെള്ളം കുടിക്കുന്നത് വയറ്റിലെ എരിച്ചിലിനും , ഗ്യാസ് തുടങ്ങിയ പ്രശ്നങ്ങൾക്കും പരിഹാരം ആണ് .
തുമ്പ ഇട്ടു കാച്ചിയ എണ്ണ തലയിൽ തേക്കുന്നത് അലർജി , നെറുകയിൽ ഉണ്ടാകുന്ന കഫ കെട്ട് തുടങ്ങിയ ബുദ്ധിമുട്ടുകൾക്ക് നല്ലൊരു പ്രതിവിധിയാണ് . തുമ്പയിലയുടെ നീരുപയോഗിച്ചു നസ്യം ചെയ്യുന്നതും ഫലപ്രദമാണ് .
തുമ്പയും തുളസിയും കൂടി ശർക്കരയിൽ ചേർത്ത് സേവിക്കുന്നത് പനിക്ക് ശമനം ഉണ്ടാക്കും . തുമ്പയിലയുടെ നീര് കണ്ണിലൊഴിക്കുന്നതു കണ്ണിനുണ്ടാകുന്ന അസ്വസ്ഥതകൾക്ക് നല്ലൊരു പ്രതിവിധിയാണ് . പ്രസവാനന്തര ശുശ്രുഷ ചെയ്യുന്ന സമയത്തു തുമ്പ ഇട്ടു തിളപ്പിച്ച വെള്ളത്തിൽ കുളിക്കുന്നത് ശരീരത്തിനും സുഖം തോന്നാനും അണുബാധ ഉണ്ടാവാതെ ഇരിക്കാനും നല്ലതാണ് .
