ലിസ്ബണ്: ചാമ്പ്യന്സ് ലീഗിന്റെ കലാശപ്പോരാട്ടത്തില് കരുത്തരായ ബയേണ് മ്യൂണിച്ചും പിഎസ്ജിയും ഇന്നിറങ്ങും. അഞ്ചു തവണ ജേതാക്കളായിട്ടുള്ള ബയേണ് ആറാം കിരീടത്തില് മുത്തമിടാനുള്ള ഒരുക്കത്തിലാണ്. എന്നാല് കന്നിക്കിരീടം ലക്ഷ്യമിട്ടാണ് പിഎസ്ജി ബൂട്ട് കെട്ടുന്നത്. ഇന്ത്യന് സമയം രാത്രി 12.30നാണ് മത്സരം നടക്കുക.
ടൂര്ണമെന്റില് ഉടനീളം മികച്ച പ്രകടനം കാഴ്ചവെച്ചാണ് ഫ്രഞ്ച്-ജര്മ്മന് ചാമ്പ്യന്മാര് ഫൈനലിന് ഇറങ്ങുന്നത്. യൂറോപ്പിലെ തന്നെ ഏറ്റവും മികച്ച ആക്രമണ നിരയുള്ള രണ്ടു ടീമുകള് കൂടിയാണ് ബയേണും പിഎസ്ജിയും. ബയേണിന്റെ ഗോള് വേട്ടക്കാരന് റോബര്ട്ട് ലെവന്ഡോസ്കിയും പിഎസ്ജിയുടെ നെയ്മറും മികച്ച ഫോമിലാണ്. ലെവന്ഡോസ്കിക്കു പുറമെ തോമസ് മുള്ളര്, സെര്ജി നാബ്രി എന്നിവരടങ്ങിയതാണ് ബയേണിന്റെ മുന്നേറ്റനിര. നെയ്മര്, ഡി മരിയ, കീലിയന് എംബാപ്പെ എന്നീ ലോകാത്തര താരങ്ങളാണ് പിഎസ്ജിയുടെ കരുത്ത്.
2015ല് അവസാനമായി ബാഴ്സയ്ക്കൊപ്പം കിരീടം നേടിയ നെയ്മര് ഇത്തവണ പിഎസ്ജിക്കൊപ്പം വീണ്ടും ചാമ്പ്യന്സ് ലീഗ് സ്വപ്നം കാണുകയാണ്. ചാമ്പ്യന്സ് ലീഗ് സ്വന്തമാക്കിയാല് 21കാരനായ എംബാപ്പെയെ കാത്തിരിക്കുന്നതും വലിയ റെക്കോഡുകളാണ്. പിഎസ്ജി ജേതാക്കളായാല് ചാമ്പ്യന്സ് ലീഗും ലോകകപ്പും സ്വന്തമാക്കിയ എലൈറ്റ് താരങ്ങളുടെ നിരയില് ഇടംപിടിക്കാന് അദ്ദേഹത്തിനു കഴിയും. കഴിഞ്ഞ ലോകകപ്പില് ഫ്രാന്സിനൊപ്പം ലോകകപ്പുയര്ത്തിയ താരമാണ് എംബാപ്പെ.
