ഹിന്ദുമത വിശ്വാസങ്ങളിൽ വളരെയധികം പ്രാധാന്യമുള്ള ഒന്നാണ് രുദ്രാക്ഷം . ശിവ ഭഗവാന്റെ അപര നാമമായ രുദ്രനും , സംസ്‌കൃതത്തിൽ കണ്ണ് എന്ന് അർത്ഥം വരുന്ന അക്ഷ എന്ന പദവും ചേർന്നതാണ് രുദ്രാക്ഷം . ശിവ ഭഗവാന്റെ കണ്ണിൽ നിന്ന് ഉതിർന്നു വീണ കണ്ണുനീർ തുള്ളിയോടും , ശിവഭഗവാന്റെ തൃക്കണ്ണിനോടും രുദ്രാക്ഷത്തെ ഉപമിക്കുന്നു .
കേരളത്തിലെ നിത്യഹരിത വനപ്രദേശങ്ങളിലും , ഹിമാലയസാനുക്കളിലും , നേപ്പാളിലും , ഉത്തരേന്ത്യൻ പ്രദേശങ്ങളിലുമാണ് രുദ്രാക്ഷ വൃക്ഷം ധാരാളമായി കണ്ടു വരുന്നത് . നീല പുറംതോടോട് കൂടിയുള്ള വൃക്ഷത്തിൽ ഉണ്ടാവുന്ന കുരുവും രുദ്രാക്ഷം എന്ന് തന്നെയാണ് അറിയപ്പെടുന്നത് .
രുദ്രാക്ഷത്തിൽ കാണപ്പെടുന്ന നീളത്തിലുള്ള വരകളെ മുഖം എന്നാണ് പറയുന്നത് . മുഖങ്ങളുടെ എണ്ണം അനുസരിച്ചു രുദ്രാക്ഷത്തെ പല ഇനങ്ങളായി തരം തിരിച്ചിരിക്കുന്നു . ഒന്ന് മുതൽ ഇരുപത്തിയൊന്ന് മുഖങ്ങൾ വരെയുള്ള രുദ്രാക്ഷമാണ് ഉള്ളത് . ഇതിൽ ഒന്ന് മുതൽ പതിനാല് മുഖം വരെയുള്ള രുദ്രാക്ഷമാണ് കൂടുതലായി കാണപ്പെടുന്നത് .
പുരാതന കാലം മുതൽക്കേ ഋഷി വര്യന്മാർ രുദ്രാക്ഷം കോർത്ത മാലകളാണ് ജപിക്കാനായി ഉപയോഗിക്കുന്നത് . ഭക്തിയുടെയും വിശുദ്ധിയുടെയും പ്രതീകമായ രുദ്രാക്ഷത്തിന് ധാരാളം ഔഷധ ഗുണങ്ങളുമുണ്ട് . വളരെ പവിത്രമായി സൂക്ഷിക്കുകയും ധരിക്കുകയും ചെയ്യേണ്ടുന്ന ഒന്നാണ് രുദ്രാക്ഷമാല .
രുദ്രാക്ഷത്തിനെ ശിവഭഗവാനുമായി ബന്ധിപ്പിക്കുന്ന ഐതിഹ്യം ദേവീമാഹാത്മ്യത്തിൽ വിവരിച്ചിട്ടുണ്ട് . ത്രിപുരൻ എന്ന ഒരസുരൻ ദേവന്മാരെയെല്ലാം തോൽപ്പിച്ച് കൊണ്ട് ഏകാധിപതിയായി മാറിയപ്പോൾ , പരിഹാരത്തിനായി ദേവന്മാർ ശിവ ഭഗവാനെ ആശ്രയിക്കുകയുണ്ടായി . ത്രിപുരനെ വധിക്കാനുള്ള മാർഗം ആലോചിക്കാൻ കണ്ണുകൾ അടച്ച ഭഗവൻ കാലങ്ങൾക്കു ശേഷമാണ് മിഴി തുറന്നത് . ആ സമയം ഭഗവാന്റെ കണ്ണിൽ നിന്നും പൊഴിഞ്ഞ അശ്രുബിന്ദു വീണാണ് രുദ്രാക്ഷവൃക്ഷം ഉത്ഭവിച്ചത് .
ശിവഭഗവാന്റെ മൂന്ന് നേത്രങ്ങളിൽ നിന്ന് മൂന്ന് തരത്തിലുള്ള രുദ്രാക്ഷ വൃക്ഷങ്ങളാണ് ഉടലെടുത്തത് . ഭഗവാന്റെ സൂര്യ നേത്രത്തിൽ നിന്നുണ്ടായവക്ക് ചുവപ്പ് നിറവും , ചന്ദ്ര നേത്രത്തിൽ നിന്നുണ്ടായവക്ക് വെള്ള നിറവും , അഗ്നി നേത്രത്തിൽ നിന്നുണ്ടായവക്ക് കറുപ്പ് നിറവുമാണുള്ളത് . ത്രിപുരനെ വധിച്ച ശിവഭഗവാന് ത്രിപുരാന്തകൻ എന്ന നാമവും ഉണ്ട് .
വളരെയധികം പവിത്രമായ രുദ്രാക്ഷം ധരിക്കുവാനുള്ള രീതികൾ പൂർവികർ അനുശാസിച്ചിട്ടുണ്ട് . കഴുത്തിൽ അണിയുന്ന രുദ്രാക്ഷ മാല ജപിക്കുവാൻ ഉപയോഗിച്ച് കൂടാ . ജപിക്കുവാനുള്ള മാല പ്രത്യേകമായി കരുതേണ്ടതാണ് . ജപിക്കുവാനായി നിർമ്മിക്കുന്ന രുദ്രാക്ഷമാലയിൽ എത്ര രുദ്രാക്ഷം വേണം എന്നുള്ളത് ജപിക്കുന്ന ആളിന് നിശ്ചയിക്കാവുന്നതാണ് എന്നാൽ അത് ഇരുപത്തിയേഴിൽ കുറയാൻ പാടുള്ളതല്ല .
പല മുഖങ്ങൾ ഉള്ള രുദ്രാക്ഷം ഉള്ളതിനാൽ ഓരോ രുദ്രാക്ഷം ധരിക്കുന്നതിനും ഓരോ ഫലങ്ങളാണ് പറഞ്ഞിട്ടുള്ളത് . ഒരു മാലയിൽ ഒരേ മുഖമുള്ള രുദ്രാക്ഷം തന്നെ ആയിരിക്കുന്നതാണ് ഉചിതം . രുദ്രാക്ഷമാല ധരിക്കുന്നതു ശരീരത്തിന്റെ ഓറയെ ബലപ്പെടുത്തുകയും തന്മൂലം അതൊരു കവചമായി ധരിക്കുന്ന ആളെ പലവിധത്തിലുള്ള ദോഷങ്ങളിൽ നിന്ന് സംരക്ഷിക്കുകയും ചെയ്യും .
ഔഷധഗുണമുള്ള രുദ്രാക്ഷം പിത്തം , കഫം , വാതം , തലവേദന , മാനസികമായി ഉണ്ടാകുന്ന അസ്വസ്ഥതകൾ , പനി , ശരീരവേദന , രക്തസമ്മർദ്ദം തുടങ്ങി നിരവധി അസുഖങ്ങൾക്കുള്ള പരിഹാരമാണ് .
