കൊക്കക്കോളയെ ബേക്കിംഗ് സോഡയോ മെന്റോസോ ചേര്‍ത്ത് ചെറിയ ചെറിയ സ്‌ഫോടനം സൃഷ്ടിക്കുന്നത് വര്‍ഷങ്ങളായി നടത്തുന്ന ഒരു പരീക്ഷണമാണ്. ഇത്തരത്തിലുള്ള വീഡിയോകള്‍ക്ക് സോഷ്യല്‍മീഡിയയില്‍ മികച്ച പ്രതികരണങ്ങളും ലഭിക്കാറുണ്ട്. എന്നാലിതാ ഒരു റഷ്യന്‍ യൂട്യൂബര്‍ അടുത്തിടെ ഈ പരീക്ഷണത്തെ മറ്റൊരു ലെവലിലേക്ക് എത്തിച്ചിരിക്കുകയാണ്. മാക്‌സിം മൊണാക്കോവ് എന്ന യൂട്യൂബറാണ് കൊക്കകേകോള ഉപയോഗിച്ച് വന്‍ സ്‌ഫോടനം നടത്തിയിരിക്കുന്നത്.
സംഭവത്തിന്റെ വീഡിയോ സോഷ്യല്‍മീഡിയയില്‍ വൈറലായി. ഓണ്‍ലൈനില്‍ വൈറലായ ഈ വീഡിയോയ്ക്ക് വേണ്ടി മാക്‌സിമും സുഹൃത്തുക്കളും 10,000 ലിറ്റര്‍ കൊക്കക്കോളയാണ് ഉപയോഗിച്ചത്. കൊക്കകോള ബേക്കിംഗ് സോഡയുമായി സംയോജിപ്പിച്ചാണ് ഇവര്‍ സ്‌ഫോടനം നടത്തിയത്. നിരപ്പായ ഒരു സ്ഥലത്ത് വെച്ചാണ് ഇവരിത് നടത്തിയത്. ഈ സ്ഥലത്ത് വലിയ ഒരു ഗീസര്‍ സ്ഥാപിച്ചു. ഇതില്‍ കോള നിറച്ചാണ് മാക്‌സിമും ടീമും പരീക്ഷണം നടത്തിയത്. ‘മൊത്തത്തില്‍, ഈ വീഡിയോയ്ക്കായി 700,000 റുബിളില്‍ കൂടുതല്‍ (6.9 ലക്ഷത്തില്‍ കൂടുതല്‍) ചെലവഴിച്ചു,’ യൂട്യൂബര്‍ അന്താരാഷ്ട്ര മാധ്യമത്തോട് വെളിപ്പെടുത്തി.
ഏകദേശം 20 മിനിറ്റ് ദൈര്‍ഘ്യമുള്ള വീഡിയോയില്‍, അദ്ദേഹവും സംഘവും ഗീസറില്‍ പതിനായിരം ലിറ്റര്‍ കൊക്കകോള നിറയ്ക്കുന്നത് കാണാം. തുടര്‍ന്ന് ഒരു ടബ് നിറയെ ബേക്കിംഗ് സോഡയും അതില്‍ നിറച്ചു. ഇതിന് ശേഷമാണ് ശീതളപാനീയത്തിന്റെ ഒരു വന്‍ സ്‌ഫോടനം നടത്തിയത്. കൊക്കകോള വാങ്ങുന്നതും പഴയ ഗീസര്‍ കൊണ്ടുവന്ന് അത് വൃത്തിയാക്കിയെടുക്കുന്നതുമെല്ലാം വീഡിയോയില്‍ കാണാം. എന്തായാലും യൂട്യൂബില്‍ പോസ്റ്റ് ചെയ്ത ഈ വീഡിയോയ്ക്ക് മികച്ച പ്രതികരണമാണ് ലഭിച്ചത്. 7 ദശലക്ഷത്തിലധികം ആളുകള്‍ വീഡിയോ കണ്ടു. 1.2 ലക്ഷത്തിലധികം ആളുകള്‍ വീഡിയോയ്ക്ക് കമന്റും ചെയ്തിട്ടുണ്ട്.
കാലിഫോര്‍ണിയ യൂണിവേഴ്‌സിറ്റി സാന്താ ബാര്‍ബറയുടെ സയന്‍സ് ലൈനിന്റെ അഭിപ്രായത്തില്‍, ബേക്കിംഗ് സോഡയിലെ കാര്‍ബണേറ്റുമായി അസിഡിക് ശീതളപാനീയത്തെ സംയോജിപ്പിച്ചതിന്റെ ഫലമാണ് സ്‌ഫോടനങ്ങള്‍, ഇത് ഹൈഡ്രജന്‍ കാര്‍ബണേറ്റ് സൃഷ്ടിക്കുന്നു. ഹൈഡ്രജന്‍ കാര്‍ബണേറ്റ് പിരിഞ്ഞ് കാര്‍ബണ്‍ ഡൈ ഓക്‌സൈഡും വെള്ളവും ആയി മാറുന്നു, ഇതാണ് വാതകമായി കുമിളയാകുന്നത്.
Comments