എന്നും നമ്മെ വിസ്മയിപ്പിക്കുന്ന ഭാരതത്തിലെ ക്ഷേത്രങ്ങളിൽ രാമപ്പ ക്ഷേത്രത്തിനു ഏറെ പ്രത്യേകതകളുണ്ട്. തെലങ്കാനയിൽ വാറങ്കലിൽ സ്ഥിതി ചെയ്യുന്ന ഈ ക്ഷേത്രത്തിന് തൊള്ളായിരം വർഷങ്ങളുടെ പഴക്കമുണ്ട്. കാകതീയ രാജാക്കന്മാരുടെ നിർമ്മാണ വിദ്യയുടെ പ്രത്യേകതകളിലേക്ക്. വെള്ളത്തിൽ പൊങ്ങികിടക്കുവാൻ സാധിക്കുന്ന തരത്തിലുള്ള ഇഷ്ടിക കല്ലുകൾ കൊണ്ട് നിർമ്മിച്ചിരിക്കുന്ന ഈ ക്ഷേത്രത്തിന് പറയുവാൻ ഒരുപാട് കഥകളുണ്ട്.
വെങ്കട്പൂർ മണ്ഡലത്തിലെ പാലംപേട്ട് ഗ്രാമത്തിൽ സ്ഥിതി ചെയ്യുന്ന ഈ ക്ഷേത്രം കാകതീയ രാജാക്കന്മാരുടെ നിർമ്മാണ വൈദഗ്ദ്ധ്യത്തിന്റെ വലിയൊരു ഉദാഹരണം തന്നെയാണ്. രാമലിംഗേശ്വര ക്ഷേത്രമെന്ന് അറിയപ്പെടുന്ന ഈ ക്ഷേത്രം രാമപ്പ ക്ഷേത്രം എന്നറിയപ്പെടുന്നത് എന്തുകൊണ്ടാണെന്നല്ലേ. രാമപ്പ എന്നത് ക്ഷേത്രം നിർമ്മിച്ച ശിൽപിയുടെ പേരാണ്. അദ്ദേഹത്തിന്റെ പേരിലാണ് ഈ ക്ഷേത്രം കൂടുതലായും അറിയപ്പെടുന്നത്. കാകതീയ രാജാവായിരുന്ന കാകതി ദേവയുടെ മുഖ്യസൈന്യാധിപൻ ആയിരുന്ന രുദ്ര സമാനിയുടെ മേൽനോട്ടത്തിലാണ് ക്ഷേത്രനിർമ്മാണം നടന്നത്.
എ ഡി 1213ൽ നിർമ്മിച്ച ഈ ക്ഷേത്രത്തിലെ മുഖ്യപ്രതിഷ്ഠ ശിവ ഭഗവാൻ ആണ്.
നക്ഷത്രാകൃതിയിലാണ് ക്ഷേത്രത്തിന്റെ തറ. ഇന്നത്തെ നിർമ്മാണവിദ്യയ്ക്ക് ചിന്തിക്കാൻ പോലുമാകാത്ത രീതിയിൽ നിർമ്മിച്ചിരിക്കുന്ന ഈ ക്ഷേത്രം നിർമ്മാണം പൂർത്തിയാകാൻ എടുത്തത് 40 വർഷം. ഏതൊരു വ്യക്തിയെയും അമ്പരിപ്പിക്കും വിധമാണ് ക്ഷേത്രത്തിലെ മുക്കും മൂലയും. മറ്റാർക്കും അനുകരിക്കാൻ സാധിക്കാത്ത വിധത്തിലുള്ള കൊത്തുപണികൾ ചുവരുകളിലും തൂണുകളിലും കാണാൻ സാധിക്കും. നർത്തകിമാർ, സംഗീതജ്ഞർ, പുരാണകഥയിലെ കഥാപാത്രങ്ങൾ എന്നിവ ഈ കൊത്തുപണികളിലെ കുറച്ചെണ്ണം മാത്രം.
ക്ഷേത്രങ്ങളുടെ ആകാശഗംഗയിൽ ഏറ്റവും തിളങ്ങി നിൽക്കുന്ന ക്ഷേത്രമെന്നാണ് ലോക സഞ്ചാരിയായിരുന്ന മാർക്കോ പോളോ രാമപ്പ ക്ഷേത്രത്തെ വിശേഷിപ്പിച്ചത്.
ക്ഷേത്രത്തിന്റെ ഒരു പ്രത്യേകതയാണ് വെള്ളത്തിൽ പൊങ്ങികിടക്കുവാൻ സാധിക്കുന്ന തരത്തിലുള്ള ഇഷ്ടികകൾ. തൂവലിനോളം ഭാരമുള്ള ഈ ഇഷ്ടികകൾ ആണ് ക്ഷേത്രനിർമ്മാണത്തിനായി ഉപയോഗിച്ചിരിക്കുന്നത്.
മറ്റൊരു പ്രത്യേകതയാണ് ഭൂമികുലുക്കം ഉണ്ടായാൽ പോലും ക്ഷേത്രം തകരാതിരിക്കാനായി ഉപയോഗിച്ചിരിക്കുന്ന സാൻഡ് ബോക്സ് ടെക്നോളജി. ഫൗണ്ടേഷൻ കുഴികളിൽ പ്രത്യേകതരത്തിലുള്ള മണൽ നിറച്ചതിലൂടെ ഭൂമികുലുക്ക സമയങ്ങളിൽ ഈ മണൽ കുഷ്യൻ പോലെ പ്രവർത്തിക്കുകയും ക്ഷേത്രം തകരുന്നത് തടയുകയും ചെയ്യുന്നു.
അത് പോലെ തന്നെ മറ്റുക്ഷേത്രങ്ങളിൽ കാണുന്ന ഇരിക്കുന്ന നന്ദിക്ക് പകരം എഴുന്നേൽക്കാൻ തയ്യാറാവുന്ന നന്ദിയുടെ രൂപമാണ് ഇവിടെ ഉള്ളത്.
ഒരുപാട് പ്രത്യേകതകൾ ഉള്ള ഈ ക്ഷേത്രത്തിൽ വർഷവും നിരവധി സന്ദർശകരാണ് വന്നെത്തുന്നത്.
Comments