ആളില്ലാത്ത നേരം നോക്കി നിര്ത്തിയിട്ടിരിക്കുന്ന കാറില് കയറി ആരെങ്കിലും ഇരുന്നാൽ എന്തായിരിക്കും അവസ്ഥ. തല്ലും കിട്ടും മോഷണക്കേസില് അകത്ത് കിടക്കേണ്ടി വരികയും ചെയ്യും. എന്നാല് അതൊരു പൊലീസ് കാറില് ആണെങ്കിലോ…? മനുഷ്യന് പകരം ആട് എന്ന വ്യത്യാസമേയുള്ളൂ. അമേരിക്കയിലെ ജോര്ജിയയിലെ ഒരു പൊലീസ് ഉദ്യോഗസ്ഥയുടെ കാറിലാണ് ആട് കയറിയത്. ഇതിന്റെ വീഡിയോ ഇപ്പോള് സോഷ്യല് മീഡിയയകളില് തരംഗമായിരിക്കുകയാണ്.
പൊലീസ് ഉദ്യോഗസ്ഥ വീട്ടില് നിന്നും ഏതാനും മീറ്റര് അകലെയുള്ള ഒരു സ്ഥലത്താണ് കാര് പാര്ക്ക് ചെയ്തിരുന്നത്. എന്നാല് സന്ദര്ശന ശേഷം മടങ്ങിയെത്തിയപ്പോള് ആട് കാര് സീറ്റില് നില്ക്കുന്നതും യാത്രക്കാരുടെ സീറ്റിലിരുന്ന പ്രധാന പേപ്പര് ഫൈയലുകള് ഭക്ഷിക്കുന്നതുമാണ് കണ്ടത്. ഉടന് തന്നെ ഉദ്യോഗസ്ഥ വാതില് തുറന്ന് പുറത്തേയ്ക്ക് കടക്കാന് പറഞ്ഞെങ്കിലും കാറില് നിന്നും പുറത്തിറങ്ങാന് ആട് കൂട്ടാക്കിയില്ല.
കാറില് നിന്നും ആടിനെ പുറത്തിറക്കാന് ബലം പ്രയോഗിക്കേണ്ടി തന്നെ വന്നു. പുറത്തിറങ്ങിയപ്പോഴും കാറിനുള്ളില് നിന്നുമെടുത്ത പേപ്പറുകള് ആടിന്റെ വായില് തന്നെയുണ്ടായിരുന്നു. അതും തിരിച്ചെടുക്കാന് ഉദ്യോഗസ്ഥ പണിപ്പെട്ടു. ഇതിനിടെ ഒരു നായ കുരച്ചുകൊണ്ട് കാറിനടുത്തേയ്ക്ക് വന്നതും ആട് എല്ലാ പേപ്പറുകളും താഴെയിട്ടു.
സെപ്റ്റംബര് ഒന്നിന് നടന്ന ഈ സംഭവം ഡൗഗ്ലസ് കൗണ്ടി ഷെരിഫ് ഓഫീസ് എന്ന ഔദ്യോഗിക ഫെയ്സ്ബുക്ക് പേജിലാണ് പങ്കുവെച്ചത്. മികച്ച പ്രതികരണമാണ് ഈ വീഡിയോയ്ക്ക് ലഭിച്ചുകൊണ്ടിരിക്കുന്നത്. നിമിഷ നേരം കൊണ്ട് തന്നെ വീഡിയോ തരംഗമാവുകയും ചെയ്തു. 2500ലധികം പേരാണ് വീഡിയോ ഇതിനോടകം തന്നെ ഷെയര് ചെയ്തിരിക്കുന്നത്.
