കറികള് തയ്യാറാക്കുമ്പോള് വീട്ടമ്മമാര്ക്ക് ഏറ്റവും കൂടുതല് വേണ്ട ഒരു സാധനം കറിവേപ്പിലയാണ്. കൂടുതല് ആളുകളും ഇപ്പോള് കറിവേപ്പില വീട്ടില് തന്നെ കൃഷി ചെയ്യാറുണ്ട്. എന്നാല് അതിനുളള സ്ഥലം ഇല്ലാത്ത ആളുകള്ക്ക് പുറത്തു നിന്ന് വാങ്ങാതെ രക്ഷയില്ല. എന്നാൽ ഇങ്ങനെ വാങ്ങുന്ന കറിവേപ്പിലകളില് കീടനാശിനികളുടെ ഉപയോഗം വളരെ കൂടുതലായിരിക്കും അതു കൊണ്ടു തന്നെ സുഹൃത്തുക്കളുടെയും ബന്ധുക്കളുടെയും വീട്ടില് കറിലേപ്പില ധാരാളം ഉണ്ടെങ്കില് കുറച്ചെടുത്ത് നാം കൊണ്ടു വരാറുണ്ട്.
എന്നാല് രണ്ടു ദിവസം കഴിയുമ്പോഴേക്കും ഇലകളെല്ലാം കൊഴിഞ്ഞു വീഴാന് തുടങ്ങുകയും ചെയ്യുന്നു. ഇങ്ങനെ കൊണ്ടുവരുന്ന കറിവേപ്പില ആഴ്ചകളോളം കേടുകൂടാതിരിയ്ക്കാന് അല്ലെങ്കില് മരത്തില് നിന്നും പറിച്ചെടുത്ത പോലെ ലഭിക്കാന് ഒരു വഴിയുണ്ട്. കറിവേപ്പില ചെടിയില് നിന്നും പട്ടകളായി പറിച്ചെടുത്ത് വാഴയിലയില് നന്നായി പൊതിഞ്ഞ് പ്ലാസ്റ്റിക് കവറില് കെട്ടി കൊണ്ടു വരണം. വീട്ടില് എത്തിയതിനു ശേഷം പ്ലാസ്റ്റിക് കവറില് നിന്നും കറിവേപ്പില പുറത്തെടുത്ത് വാഴയിലയോടു കൂടി വായു കടക്കാത്ത പ്ലാസ്റ്റിക് പാത്രത്തിലോ കുപ്പിയിലോ ഇട്ട് നന്നായി മൂടി വയ്ക്കണം. ആവശ്യാനുസരണം ഉപയോഗിച്ച് കഴിഞ്ഞാല് വീണ്ടും അതുപോലെ തന്നെ വാഴയിലയില് പൊതിഞ്ഞ് വായു കയറാതെ മൂടി വെയ്ക്കണം.
ഇങ്ങനെ സൂക്ഷിക്കുകയാണെങ്കില് കറിവേപ്പില മരത്തില് നിന്ന് പറിച്ചെടുക്കുന്ന അതേ പുതുമയോടെ തന്നെ നമുക്ക് ഉപയോഗിക്കാം. സാധാരണരീതിയില് പ്ലാസ്റ്റിക് കവറില് പൊതിഞ്ഞാണ് നമ്മള് സൂക്ഷിക്കുന്നത് എങ്കില് രണ്ടു മൂന്നു ദിവസം കഴിയുമ്പോഴേക്കും കറിവേപ്പിലയുടെ ഇലകളെല്ലാം വാടി തുടങ്ങുകയും കറുപ്പുനിറം വരുകയും ചെയ്യുന്നു. എന്നാല് വാഴയിലയില് അടച്ചു സൂക്ഷിക്കുന്ന കറിവേപ്പിലക്ക് ഇത്തരത്തിലുള്ള ഒരു പ്രശ്നങ്ങളും വരില്ല. ഇങ്ങനെ സൂക്ഷിക്കുമ്പോള് കറിവേപ്പിലയുടെ നിറമോ മണമോ ഗുണമോ നഷ്ടപ്പെടുന്നില്ല.
Comments