ന്യൂഡൽഹി : ലോകത്തെ ഹൈപ്പര് സോണിക് മിസൈല് ക്ലബ്ബില് സ്ഥാനം നേടി ഇന്ത്യയും. അമേരിക്കയ്ക്കും റഷ്യയ്ക്കും ചൈനയ്ക്കും പിന്നാലെ ഹൈപ്പര് സോണിക് മിസൈലുകള് വിക്ഷേപിക്കാനുള്ള സാങ്കേതികവിദ്യ കൈവശമുള്ള നാലാമത്തെ രാജ്യമാണ് ഇന്ത്യ.
2019 ലെ ഒരു ശ്രമം പരാജയപ്പെട്ടതിനുശേഷം, തദ്ദേശീയമായി വികസിപ്പിച്ച പ്രൊപ്പൽഷൻ സംവിധാനം ഉപയോഗിച്ച് ഹൈ-സ്പീഡ് ടെക്നോളജി ഡെമോൺസ്ട്രേറ്റർ വെഹിക്കിളിന്റെ (എച്ച്എസ്ടിഡിവി) കന്നി പരീക്ഷണ പറക്കൽ വിജയകരമായി നടത്തിക്കൊണ്ടാണ് ഇന്ത്യ എലൈറ്റ് രാജ്യങ്ങളുടെ ക്ലബിൽ അംഗമായത്.ഹൈപ്പര് സോണിക്കിനേക്കാള് വേഗമുള്ള മിസൈല് ഇന്നുവരെ ഒരു രാജ്യവും കണ്ടുപിടിച്ചിട്ടില്ല. കൂറ്റന് വിമാനവാഹിനിക്കപ്പലുകളെപ്പോലും വളരെ എളുപ്പം തകര്ക്കാന് ഈ മിസൈലുകള്ക്ക് കഴിയും.
സെക്കന്റില് രണ്ട് കിലോ മീറ്ററിലധികം സഞ്ചരിക്കാന് ഹൈപ്പര് സോണിക് മിസൈലുകള്ക്ക് സാധിക്കും. അടുത്ത അഞ്ച് വര്ഷത്തിനുള്ളില് ഡി.ആര്.ഡി.ഒയ്ക്ക് ഹൈപ്പര് സോണിക് മിസൈലുകള് വികസിപ്പിക്കാനുള്ള ശേഷിയാണ് ഇതിലൂടെ നേടിയെടുത്തത്.
നിലവില് ഹൈപ്പര് സോണിക് മിസൈലുകളെ തടയാന് കഴിയുന്ന മിസൈല് സാങ്കേതിക വിദ്യ ഒരു രാഷ്ട്രങ്ങള്ക്കുമില്ല. ഒരു മിസൈലിനെ തടയണമെങ്കില് ആ മിസൈലിനേക്കാള് വേഗമാര്ജ്ജിക്കാന് കഴിയുന്ന മറ്റൊരു മിസൈലിനു മാത്രമേ സാദ്ധ്യമാകൂ.
നാസ എക്സ് 43, ബോയിങ് എക്സ് 51 വേവ്റൈഡർ തുടങ്ങിയ പ്രശസ്തമായ പരീക്ഷണ വിമാനങ്ങൾ ഈ വേഗം യാഥാർഥ്യമാക്കിയവയാണ്.ഇന്ത്യയുടെ തന്നെ അവതാർ തുടങ്ങിയ ചെറുവിമാന സങ്കൽപവും ഇതിനെ അടിസ്ഥാനപ്പെടുത്തിയാണ്.ഭാവിയിൽ ബഹിരാകാശ, പ്രതിരോധ, വ്യോമയാന രംഗങ്ങളിൽ വിപ്ലവം സൃഷ്ടിക്കാവുന്ന ഒന്നായിട്ടാണ് ഹൈപ്പർസോണിക് സാങ്കേതിക വിദ്യ കരുതപ്പെടുന്നത്.
അടുത്തിടെ അമേരിക്കൻ പ്രസിഡന്റ് ഡൊണാൾഡ് ട്രംപ് “ഒരു സൂപ്പർ ഡ്യൂപ്പർ” മിസൈൽ പ്രയോഗിച്ചു. നിലവിൽ യുഎസ് മിസൈൽ ആയുധപ്പുരയിൽ ഉള്ളതിനേക്കാൾ 17 മടങ്ങ് വേഗത്തിൽ സഞ്ചരിക്കാൻ മിസൈലിന് കഴിവുണ്ടെന്ന് അദ്ദേഹം അവകാശപ്പെട്ടു. എന്നാലും ഹൈപ്പര് സോണിക് മിസൈല് പരീക്ഷണത്തില് റഷ്യയാണ് മുൻപിൽ. കിൻഷാൽ ഹൈപ്പർസോണിക് മിസൈലണ് റഷ്യ പുറത്തിറക്കിയത്.
റഷ്യൻ മാദ്ധ്യമങ്ങളുടെ റിപ്പോർട്ട് അനുസരിച്ച് ഹൈപ്പർസോണിക് ബൂസ്റ്റ്-ഗ്ലൈഡ് വാഹനം കൊണ്ട് സജ്ജീകരിച്ചിരിക്കുന്ന തന്ത്രപരമായ ഭൂഖണ്ഡാന്തര ബാലിസ്റ്റിക് മിസൈൽ സംവിധാനമാണ് ഏറ്റവും പുതിയ മിസൈലായ അവാംഗാർഡ്, അന്തരീക്ഷത്തിലെ ഇടതൂർന്ന പാളികളിൽ ശബ്ദത്തിന്റെ 20 ഇരട്ടി വേഗതയിൽ പറക്കാൻ ഇതിനു കഴിയും.
റഷ്യയുടെ സിര്ക്കോണ് എന്ന ഹൈപ്പര്സോണിക് മിസൈല് പരീക്ഷണങ്ങളുടെ അന്തിമ ഘട്ടത്തിലാണ്. 2020 അവസാനമോ അടുത്തവര്ഷം ആദ്യമോ ഈ മിസൈല് റഷ്യന് വ്യോമസേനയുടെ ഭാഗമാകുമെന്നാണ് റിപ്പോര്ട്ടുകള്.
