ന്യൂഡല്ഹി: ഉന്നത പദവിയിലിരിക്കേ സര്ക്കാര് ഭൂമി പാട്ടത്തിന് നല്കിയതിന്റെ പേരില് ഉദ്യോഗസ്ഥനെതിരെ സി.ബി.ഐ അന്വേഷണം ആരംഭിച്ചു. ഹിന്ദുസ്ഥാന് എയറോനോട്ടിക്സ് ലിമിറ്റഡിലെ എസ്.വേല്മുരുഗനാണ് അഴിമതി നടത്തിയതായി കണ്ടെത്തിയത്. എയറോനോ ട്ടിക്സ് ഔദ്യോഗികമായി നല്കിയ പരാതിയിലാണ് സി.ബി.ഐ അന്വേഷണം ഏറ്റെടുത്തത്.
എയറോനോട്ടിക്സിന്റെ ഡെപ്യൂട്ടി ജനറല് മാനേജരായിരിക്കേയാണ് വേല്മുരുഗന് ഭൂമി പാട്ടത്തിന് നല്കിയത്. കമ്പനിയുടെ 6.5 ഏക്കര് സ്ഥലം ബംഗളൂരുവിലെ ഒരു സ്വകാര്യ കമ്പനിയ്ക്ക് പാട്ടത്തിന് നല്കിയെന്നാണ് കണ്ടെത്തിയത്. ബംഗളൂരു ഐ.എസ്.ആര്.ഒയുടെ എതിര്വശത്താണ് ഹിന്ദുസ്ഥാന് എയറോനോട്ടിക്സ് സ്ഥിതിചെയ്യുന്നത്.
സര്ക്കാര് വകുപ്പിനെ വഞ്ചിച്ചതിന്റെ പേരിലും, ക്രിമിനല് നടപടി ക്രമത്തിന്റെ പേരിലുമാണ് കേന്ദ്ര ഏജന്സി അന്വേഷണം നടത്തുന്നത്. ഏതു വര്ഷമാണ് ഇയാള് അഴിമതിക്കാധാരമായ ഭൂമി തട്ടിപ്പ് നടത്തിയതെന്ന വിവരം സി.ബി.ഐ പുറത്തുവിട്ടിട്ടില്ല.
