നല്ല വേഗതയിൽ പോയിക്കൊണ്ടിരിക്കുന്ന കാറിൽ റിവേഴ്‌സ് ഗിയറിട്ടാൽ എന്താ സംഭവിക്കുക? ചിന്തിച്ചിട്ടുണ്ടോ.
എന്തിനാണ് റിവേഴ്‌സ് ഗിയർ എന്ന് എല്ലാവർക്കും അറിയാം. വാഹനത്തെ പിറകിലേക്ക് ഓടിക്കാൻ ആയാണ് റിവേഴ്‌സ് ഗിയർ ഉപയോഗിക്കുന്നത്.
അമിതവേഗതയിൽ പോകുന്ന ഒരു കാർ അതായത് ആ വാഹനം അഞ്ചാമത്തെ ഗിയറിൽ ആണ് സഞ്ചരിക്കുന്നത് എന്ന് കരുതുക. ആ സമയത്ത് റിവേഴ്‌സ് ഗിയറിലേക്ക് മാറാമെന്ന് കരുതിയാലും റിവേഴ്‌സ് ഗിയർ വീഴില്ല എന്നതാണ് സത്യാവസ്ഥ. നിർമ്മാതാക്കൾ വാഹനത്തിൽ സെറ്റ് ചെയ്ത് വെച്ചിരിക്കുന്ന റിവേഴ്‌സ് ഇൻഹിബിറ്റ് എന്ന സംവിധാനം വഴിയാണ് ഇങ്ങനെ സംഭവിക്കുന്നത്. സ്പീഡിൽ പോകുന്ന ഒരു വാഹനത്തിന് റിവേഴ്‌സ് ഗിയറിലേക്ക് കടക്കാൻ സാധിക്കില്ല. എന്നാൽ അതേ സമയം വേഗത കുറവായിരിക്കുമ്പോൾ റിവേഴ്‌സ് ഗിയറിലേക്ക് വീഴാൻ വാഹനത്തിലെ സംവിധാനം അനുവദിക്കും. സാധാരണ വേഗതയിൽ പോകുന്ന വാഹനത്തിൽ റിവേഴ്‌സ് ഗിയർ വീഴില്ല. ശക്തി ഉപയോഗിച്ച് ഇടാൻ ശ്രമിച്ചാൽ വാഹനം ഒരു ശബ്ദമുണ്ടാക്കി മുന്നറിയിപ്പ് നൽകും.
റിവേഴ്‌സ് ഇൻഹിബിറ്റ് എന്ന സംവിധാനം പുതിയ വാഹനങ്ങളിൽ ആണ് കാണാൻ സാധിക്കുക. അതേ സമയം പഴയ കാറുകളിൽ ഇത് ഇല്ല. അങ്ങനെയുള്ള കാറുകൾ വേഗതയിൽ പോയിക്കൊണ്ടിരിക്കുമ്പോൾ റിവേഴ്‌സ് ഗിയർ ഇടുന്നത് ഗിയർബോക്സിന്റെ പ്രവർത്തനങ്ങളെ സാരമായി ബാധിക്കുമെന്ന് ഉറപ്പ്.
വാഹനങ്ങൾ പാർക്ക് ചെയ്യുന്നതിനും മറ്റുമാണ് പലരും റിവേഴ്‌സ് ഗിയർ ഉപയോഗിക്കുന്നത്. എന്നാൽ റിവേഴ്‌സ് ഗിയറിൽ ഒരു വാഹനം എത്ര ദൂരം മുന്നോട്ട് പോകുമെന്ന് ചിന്തിച്ചിട്ടുണ്ടോ? ഫസ്റ്റ് ഗിയറിൽ ഒരു വാഹനം എത്രത്തോളം മുന്നോട്ട് പോകുമോ അത്രത്തോളം തന്നെ റിവേഴ്‌സ് ഗിയറിൽ വാഹനം പിറകിലേക്ക് പോകും. റിവേഴ്‌സ് ഗിയറിൽ പോകുമ്പോൾ നിശ്ചിത വേഗത പാലിച്ചില്ലെങ്കിൽ വാഹനം ഓഫ് ആയി പോകുമെന്നതും മറക്കണ്ട.
അതേ സമയം റിവേഴ്‌സ് ഗിയർ ഇട്ട് അധിക നേരം വാഹനം പിറകിലേക്ക് ഓടിക്കരുത്. ഒരു ഗിയറിൽ മാത്രം പ്രവർത്തിക്കുമ്പോൾ ആർപിഎം ഉയരുകയും താപവും ശബ്ദവും വർധിക്കുകയും ചെയ്യും. തുടരെ തുടരെ റിവേഴ്‌സ് ഗിയർ ഇട്ട് വാഹനം ഓടിക്കുന്നത് എഞ്ചിനും ഗിയർബോക്‌സും നശിക്കാനും ഇടയാക്കും.
