മാഡ്രിഡ: ബാഴ്‌സ താരം ലൂയിസ് സുവാരസ് സ്പാനിഷ് ലീഗില്‍ തുടരുമെന്ന് ഉറപ്പായി. ബാഴ്‌സലോണയുടെ ഫ്രീ ട്രാന്‍സ്ഫര്‍ വ്യവസ്ഥയില്‍ അതിലറ്റികോ മാഡ്രിഡിലേക്കാണ് ഉറുഗ്വേ താരം ചേക്കേറുന്നത്. ഇറ്റാലിയന്‍ ലീഗിലെ യുവന്റസിലേയ്‌ക്ക് മാറാന്‍ തയ്യാറായെങ്കിലും പാസ്സ് പോര്‍ട്ട് സംബന്ധമായ രേഖകളുടെ അഭാവം കാരണം തീരുമാനം മാറ്റുകയായിരുന്നു.
സുവാരസിനെ ബാഴ്‌സയില്‍ നിന്നും വിടാമെന്നും എന്നാല്‍ ലീഗിലെ മറ്റൊരു ടീമില്‍ കളിക്കരുതെന്നുമുള്ള വ്യവസ്ഥ ബാഴ്‌സലോണ ചെയര്‍മാന്‍ ജോസെഫ് മരിയ ബര്‍ത്യോമിയോ മുന്നോട്ട് വച്ചിരുന്നു. എന്നാല്‍ മെസ്സി വിവാദത്തില്‍ പെട്ട ബര്‍ത്യോമയുടെ മറ്റ് പല വിവരങ്ങളും താന്‍ മാദ്ധ്യമങ്ങളോട് പറയുമെന്ന സുവാരസിന്റെ വിരട്ടല്‍ ഫലിക്കുകയായിരുന്നുവെന്നാണ് അന്താരാഷ്‌ട്ര മാദ്ധ്യമങ്ങള്‍ പറയുന്നത്. സുവാരസ് സ്പാനിഷ് ലീഗില്‍ എതിരെ കളിക്കുന്നത് ബാഴ്‌സലോണയ്‌ക്ക് വെല്ലുവിളിയാണ്. പ്രത്യേകിച്ച് മെസ്സിക്ക് വലിയ പിന്തുണ കൊടുത്തിരുന്ന താരം എന്ന നിലയില്‍ സുവാരസിന് മെസ്സിയുടെ നീക്കങ്ങള്‍ നന്നായി മനസ്സിലാകുമെന്നതാണ് ഒരു വെല്ലുവിളിയെന്നും ഫുട്‌ബോള്‍ വിദഗ്ധര്‍ വിലയിരുത്തുന്നു.
ബാഴ്‌സലോണയ്‌ക്കായി 6 വര്‍ഷത്തിനിടെ 283 മത്സരങ്ങളിലായി 198 ഗോളുകളാണ് സുവാരസ് അടിച്ചുകൂട്ടിയത്. 260 കോടിരൂപയാണ് ബാഴ്‌സലോണ സുവാരസിന് ഒരു വര്‍ഷം നല്‍കിയിരുന്നത്. ഇന്നലെയാണ് ബാഴ്‌സലോണ ക്ലബ്ബ് സുവാരസിന് നന്ദി അറിയിച്ചുള്ള ഔദ്യോഗിക കത്ത് കൈമാറിയത്. ഇന്ന് സുവാരസിന് ഔദ്യോഗിക യാത്ര അയപ്പും പത്രസമ്മേളനവും നടത്തുമെന്നും ബാഴ്‌സലോണ അറിയിച്ചു.
