വിദ്യാര്ത്ഥികള്ക്ക് ഏറ്റവും സന്തോഷം നല്കുന്ന അല്ലെങ്കില് അവര് ഏറ്റവുമധികം ആഘോഷത്തോടെ വരവേല്ക്കാന് കാത്തിരിക്കുന്ന ഒന്നാണ് കലോത്സവങ്ങള്. വിവിധ വര്ണ്ണത്തിലുള്ള ശലഭങ്ങളെ പോലെ കുട്ടികള് വേദികളില് വര്ണ്ണ വിസ്മയം തീര്ക്കുന്ന സമയം. സ്കൂള് കലോത്സവം കഴിഞ്ഞാല് പിന്നെ അങ്ങോട്ട് ജില്ല, സംസ്ഥാന കലോത്സവങ്ങള്ക്കുളള അണിയറ ഒരുക്കങ്ങള് നടത്താനുള്ള സമയമാണ്. ചിത്രരചന, നാടോടി നിര്ത്തം, ക്ലാസിക്കല് നൃത്തം, നാടകം, മിമിക്രി, മോണോ ആക്ട, തുടങ്ങി നിരവധി വിഭാഗങ്ങളില് മത്സരങ്ങളാണ് ഉണ്ടാവുക. വേദി ഒന്ന്, രണ്ട്. മൂന്ന് എന്നിങ്ങനെ പലയിടത്തായി വിവിധ കലാപരിപാടികള് നിറഞ്ഞാടുന്നു.
ഒരുപാട് കൊച്ചു കലാകാരന്മാരും കലാകാരന്മാരും ഇതിനായി കാത്തിരിക്കുന്നു. കലോത്സവങ്ങളില് പങ്കെടുക്കുന്ന സുഹൃത്തുക്കളെ പ്രോത്സാഹിപ്പിക്കാനായി ആർപ്പുവിളികളും അട്ടഹാസവുമായി കൂട്ടുകാരും ഒപ്പമുണ്ടാവും. കുട്ടികള്ക്ക് സന്തോഷത്തിന്റെ ഒരു ഉത്സവ കാലം തന്നെയാണ് ഇത്. ഇതിനോടൊപ്പം തന്നെ് ഓരോ മത്സരാര്ത്ഥികളെയും പ്രോത്സാഹിപ്പിക്കാനായി രക്ഷിതാക്കളും അധ്യാപകരും ഒരുപോലെ ഇവരോടൊപ്പം നില്ക്കും. ഒരുപാട് കുട്ടികളുടെ കഴിവുകള് പുറത്തു കൊണ്ടു വരാനും ഒരുപാട് നല്ല കലാപ്രതിഭകളെ തിരിച്ചറിയാനും സാധിക്കുന്ന സമയം.
‘അടുത്ത വര്ഷവും ഇത് ഞങ്ങള്ക്ക്‘എന്ന ആവേശത്തോടെയാണ് ഓരോ വര്ഷത്തെയും സ്കൂള് കലോത്സവങ്ങളുടെ കലാശക്കൊട്ട് നടത്തുന്നത്. എന്നാല് ഈ വര്ഷം മത്സരമില്ല, മത്സരവേദികളില് ആഘോഷത്തിമിര്പ്പില്ല. ലോകമൊന്നാകെ കൊറോണയെന്ന മഹാമാരി ക്കെതിരെയുള്ള പ്രതിരോധം മാത്രം. ഈ വര്ഷം സ്കൂളുകളില് എത്താന് പോലും വിദ്യാര്ത്ഥികള്ക്ക് സാധിച്ചിട്ടില്ല. അടുത്ത വര്ഷം പുതിയൊരു തുടക്കം എന്ന പ്രതീക്ഷ മാത്രമാണ് ബാക്കി. ഈ മഹാമാരിക്കും അറുതിവരും ഉറച്ച ചുവടുകളോടെ വീണ്ടും തിരിച്ചുവരും എന്ന പ്രതീക്ഷയും കലയും കലോത്സവങ്ങളും ഒരിക്കലും അവസാനിക്കുന്നില്ല എന്ന വിശ്വാസവുമാണ് ബാക്കി.
Comments