ഇതിഹാസ നടനായ അമിതാബ് ബച്ചൻ

ബോളിവുഡിലെ “ഷെഹൻഷാ ” അഥവാ “ബിഗ് ബി ” എന്നറിയപ്പെടുന്ന മെഗാസ്റ്റാർ അമിതാഭ് ബച്ചൻ എഴുപത്തിയെട്ട് വയസ്സ് പൂർത്തിയാക്കുമ്പോൾ , അദ്ദേഹത്തിന്റെ അഞ്ച് പതിറ്റാണ്ട് നീണ്ട സിനിമ ജീവിതം ഇന്നും ആരാധകർക്ക് വിസ്മയമാണ് .എഴുപത്തിയെട്ടാം വയസ്സിലും അദ്ദേഹം തന്റെ സഹപ്രവർത്തകർക്കും ചലച്ചിത്രലോകത്തിനും മാതൃകയാവുന്നു എന്നുള്ളത് ശ്രദ്ധേയമായ കാര്യമാണ് .

ബോളിവുഡിലെ നിറ സാന്നിദ്ധ്യമായ അമിതാബ് ബച്ചന്റെ നിഷ്കളങ്കത നിറഞ്ഞ സ്വഭാവമാണ് ഇന്നും ജനഹൃദയങ്ങളിൽ അദ്ദേഹത്തിന് സ്ഥാനം നൽകുന്നത് പുതിയ ചിത്രങ്ങളുടെ ഒരു നീണ്ട നിര തന്നെയാണ് വരാനിരിക്കുന്ന നാളുകളിൽ പുറത്തിറങ്ങാനായി തയ്യാറെടുത്ത് കൊണ്ടിരിക്കുന്നത് .

പ്രശസ്ത കവി ഹരിവന്ഷ് റായ് ബച്ചന്റെയും തേജി ബച്ചന്റെയും മകനായി 1942 ഒക്ടോബർ 11 ന് അലഹബാദിൽ വെച്ചാണ് അമിതാഭ് ബച്ചന്റെ ജനനം . ഒരുകാലത്ത് ബോളിവുഡ് ചിത്രങ്ങളിലെ നായിക ആയിരുന്ന ജയ ബാദുരി ആണ് അദ്ദേഹത്തിന്റെ പത്നിയായ ജയ ബച്ചൻ . മകളായ ശ്വേത ബച്ചൻ സിനിമ ലോകത്തേക്ക് പ്രവേശിച്ചില്ല എങ്കിലും മകനായ അഭിഷേക് ബച്ചൻ അച്ഛന്റെ പാത പിന്തുടർന്ന് കൊണ്ട് സിനിമാലോകത്തേക്ക് പ്രവേശിക്കുകയായിരുന്നു .

അമിതാബ് ബച്ചന്റെ അഞ്ച് പതിറ്റാണ്ട് നീണ്ടു നിന്ന സിനിമ ജീവിതത്തിൽ ഒട്ടധികം ചിത്രങ്ങളിൽ അഭിനയിക്കുകയും അത്രയധികം തന്നെ നേട്ടങ്ങൾ അദ്ദേഹം കൈവരിക്കുകയും ചെയ്തിട്ടുണ്ട് . അഞ്ചു പ്രാവശ്യം ദേശീയ പുരസ്‌കാരം നേടിയ അമിതാബ് ബച്ചനെ 1984 ൽ പദ്മശ്രീയും , 2001 ൽ പദ്മഭൂഷണും , 2015 ൽ പദ്മവിഭൂഷണും നൽകി രാജ്യം അദ്ദേഹത്തെ ആദരിക്കുകയുണ്ടായി . 2018 ൽ അദ്ദേഹത്തെ തേടി ദാദ സാഹേബ് ഫാൽക്കെ അവാർഡും എത്തുകയുണ്ടായി .

1969 ൽ സാത്ത് ഹിന്ദുസ്ഥാനി എന്ന ചിത്രത്തിലൂടെ അഭിനയരംഗത്തേക്ക് പ്രവേശിച്ച അദ്ദേഹത്തിന് പിന്നീട് തിരിഞ്ഞു നോക്കേണ്ടി വന്നിട്ടില്ല .ബോളിവുഡിലെ ഏറ്റവും മികച്ചതും സ്വാധീനമുള്ളതുമായ നടന്മാരിൽ ഒരാളാണ് അദ്ദേഹം.