ആദിപരാശക്തിയെ പൂജിക്കുന്ന നവരാത്രി ഇന്ത്യയുടെ പല ഭാഗങ്ങളിലും വ്യത്യസ്ത രീതികളിൽ ആണ് ആഘോഷിക്കുന്നത് . ഡൽഹിയിൽ രാംലീല തുടങ്ങിയവയ്ക്ക് നവരാത്രി ആഘോഷങ്ങളിൽ പ്രാധാന്യം ലഭിക്കുമ്പോൾ പശ്ചിമ ബംഗാളിൽ ദുർഗ്ഗ പൂജക്കാണ് പ്രാധാന്യം . ഗുജറാത്തിൽ ഗർബ നൃത്തം അവതരിപ്പിച്ചാണ് നവരാത്രി ആഘോഷിക്കുന്നതെങ്കിൽ , ദക്ഷിണേന്ത്യയിൽ കാണുന്ന നവരാത്രി ആഘോഷങ്ങളുടെ ഭാഗമാണ് ബൊമ്മക്കൊലു അഥവ നവരാത്രി ക്കൊലു .
തമിഴ്നാട്, കർണാടക, ആന്ധ്രാപ്രദേശ് എന്നിവിടങ്ങളിൽ ആഘോഷിക്കുന്ന ഈ ഉത്സവത്തിൽ അനേകം ദേവന്മാർ, ദേവതകൾ, പുരുഷന്മാർ, മൃഗങ്ങൾ, കുട്ടികൾ എന്നിവരുടെ പാവകളെ പടിപടിയായി അണിനിരത്തി വെക്കുന്നതാണ് ബൊമ്മ ക്കൊലു.തമിഴിൽ ക്കൊലു ദിവ്യ സാന്നിധ്യത്തെ സൂചിപ്പിക്കുമ്പോൾ , തെലുങ്കിൽ ഇത് സൂചിപ്പിക്കുന്നത് കളിപ്പാട്ടങ്ങളുടെ നിര എന്നതാണ് . കന്നടയിൽ അർത്ഥമാക്കുന്നത് പാവകളുടെ ഉത്സവം എന്നാണ് .
രാമായണം, പുരാണങ്ങൾ, ദശവതാരം തുടങ്ങിയ തലമുറകളിലേക്ക് കൈമാറ്റം ചെയ്യപ്പെട്ട പുരാണ കഥകളെ ആണ് ഇവ ചിത്രീകരിക്കുന്നത് .കാലാതീതവും പുരാതനവുമായ കഥകളിൽ നിന്ന് നാം ഉൾകൊണ്ട വിലയേറിയ പാഠങ്ങൾ വീണ്ടും സ്മരിക്കുക എന്നതാണ് ഈ ചടങ്ങു കൊണ്ടുദ്ദേശിക്കുന്നത് . പാവകളെ നിരത്തി വെക്കുന്ന പടികളെ നമ്മുടെ ജീവിതത്തിലെ ഓരോ പരിണാമ ഘട്ടത്തെയും സൂചിപ്പിക്കുന്നു .
ഒറ്റ സംഖ്യ അനുസരിച്ചു പല തട്ടുകളിലായിട്ടാണ് പാവകളെ അണിനിരത്തുന്നത് .പാവകളുടെ ലഭ്യത അനുസരിച്ചു ഒന്ന് മുതൽ പതിനൊന്ന് വരെയുള്ള സംഖ്യയിൽ അവയെ നിരത്താവുന്നതാണ് .നവരാത്രിയുടെ ഒൻപത് രാത്രികളെ പ്രതിനിധീകരിക്കുന്നതിനായി ചില കുടുംബങ്ങൾ പാവകളെ ഒൻപത് തട്ടുകളിലായി നിരത്തുക പതിവാണ് . തട്ടുകൾ ഭംഗിയുള്ള തുണികൾ കൊണ്ട് അലങ്കരിച്ചതിന് ശേഷമാണ് അവയിൽ പാവകളെ അണിനിരത്തുന്നത് .
ആദ്യത്തെ പടിയിൽ കലശവും , ആദിപരാശക്തിയുടെ പലരൂപങ്ങളെ അനുസ്മരിപ്പിക്കുന്ന പാവകളെയും ആണ് നിരത്തുക . മറ്റ് പടികളിൽ സന്യാസി ശ്രേഷ്ഠന്മാരുടെയും , വീരന്മാരുടെയും പാവകളും കല്യാണം , മറ്റു കലകൾ തുടങ്ങിയവയെ പ്രതിനിധീകരിക്കുന്ന പാവകളെയുമാണ് അണിനിരത്തുക .ഓരോ വർഷവും മുൻ വർഷത്തേക്കാൾ ഒരു പാവ കൂടുതലായി വെക്കണം എന്നുള്ളത് ആചാരമാണ് .
മൂന്ന് മുതൽ ഒൻപത് ദിവസം വരെ പാവകളെ വെച്ച് ആരാധിക്കുക പതിവാണ് . മഹാനവമിയുടെ അന്ന് ആദിപരാശക്തിയുടെ ബൊമ്മകൾക്ക് അടുത്തായി പുസ്തകങ്ങളും മറ്റും പൂജ വെക്കുകയും , വിജയദശമിയുടെ അന്ന് വിദ്യാരംഭം കുറിച്ച് പൂജ വെച്ചിരിക്കുന്ന സാധനങ്ങൾ തിരിച്ചെടുക്കുകയും ചെയ്യുന്നു .
ഇന്ത്യയുടെ സമ്പന്നവും വർണ്ണാഭമായതുമായ ചരിത്ര-സാംസ്കാരിക പൈതൃകത്തിന്റെ ആനന്ദകരമായ ഓർമ്മപ്പെടുത്തലാണ് ഇത്തരത്തിൽ ഉള്ള നവരാത്രി ആഘോഷങ്ങൾ .
