പത്തനംതിട്ട: മൂഴിയാർ ശബരിഗിരി ജലവൈദ്യുത പദ്ധതിയിലെ കക്കി അണക്കെട്ട് ഇന്ന് തുറക്കുമെന്ന് ചീഫ് പബ്ലിക് റിലേഷൻ ഓഫീസർ അറിയിച്ചു. ജലനിരപ്പ് ഇന്നലെ രാത്രി 10 മണിയോടെ 978.33മീറ്റർ എത്തിയതിനെത്തുടർന്ന് കെ എസ് ഇ ബി റെഡ് അലെർട് പ്രഖ്യാപിച്ചിരുന്നു.
കക്കി അണക്കെട്ടിൽ നിലവിൽ 978.83 മീറ്റർ വരെ ജലം സംഭരിക്കാവുന്നതാണ്. ഇപ്പോൾ ലഭിക്കുന്ന ജലപ്രവാഹത്തിന്റെ തോത് അനുസരിച്ച് അടുത്ത 32 മണിക്കൂറിനുള്ളിൽ ജലം കവിയാൻ സാധ്യതയുണ്ട്. സ്ഥിതിഗതി നേരിടുന്നതിനായി കെ എസ് ഇ ബിയുടെ സാങ്കേതിക വിഭാഗം എല്ലാ മുൻകരുതലുകളും സ്വീകരിച്ചിട്ടുണ്ട്.
അപകടനില കവിഞ്ഞാൽ സ്പിൽവേ നേരിയ തോതിൽ തുറന്ന് വെള്ളം ഒഴുക്കിവിടും. വെള്ളം പുറത്തേക്കു ഒഴുക്കിയാൽ 3 മണിക്കൂറിനുശേഷമാകും വെള്ളം ത്രിവേണിയിലെത്തി ചേരുക. അതെ സമയം കാലാവസ്ഥാ വകുപ്പിന്റെ പ്രവചനപ്രകാരം ആലപ്പുഴ, പത്തനംതിട്ട ജില്ലകളിൽ നേരിയതോതിലുള്ള മഴയെ ഉണ്ടാകുകയുള്ളതിനാൽ നദിയിലെ ജലനിരപ്പ് വലിയ തോതിൽ ഉയരുവാൻ സാധ്യതയില്ല. അതിനാൽ വെള്ളത്തിന്റെ ഒഴുക്ക് ശക്തി പ്രാപിക്കുമെന്നതിനാൽ, നദിയിൽ കുളിക്കുന്നതും, തുണി കഴുകുന്നതും, മീൻ പിടിക്കുന്നതും കഴിവതും ഒഴിവാക്കേണ്ടതാണെന്ന് ചീഫ് പബ്ലിക് റിലേഷൻസ് ഓഫീസർ വ്യക്താമാക്കി.
Comments