ന്യൂഡൽഹി: വ്യക്തി വിവരങ്ങൾക്ക് സുരക്ഷിതത്വം ഉറപ്പു നൽകി ജിയോയുടെ വെബ് ബ്രൗസര് പുറത്തിറക്കി. ‘ജിയോ പേജസ്’ എന്ന പേരിലാണ് ഇന്റർനെറ്റ് വെബ് ബ്രൗസർ പുറത്തിറക്കിയിരിക്കുന്നത്. പൂർണമായും ഇന്ത്യയില് രൂപകല്പന ചെയ്തതാണ് ബ്രൗസര് എന്ന് കമ്പനി വ്യക്തമാക്കി. ഓരോ വ്യക്തികളുടെയും താൽപര്യങ്ങൾ അനുസരിച്ചാണ് ജിയോ പേജസ് സജ്ജമാക്കിയിരിക്കുന്നത്.
ഇന്ത്യയിൽ എട്ട് ഭാഷയിൽ ബ്രൗസർ ലഭ്യമാണ്. ഹിന്ദി, മറാത്തി, തമിഴ്, ഗുജറാത്തി, തെലുങ്ക്, മലയാളം, കന്നഡ, ബംഗാളി എന്നീ ഭാഷകളാണ് ബ്രൗസറില് ലഭിക്കുക. നിലവില് ഗൂഗിള് പ്ലേ സ്റ്റോറില് മാത്രമാണ് ജിയോ പേജസ് ബ്രൗസര് ലഭ്യമാക്കിയിരിക്കുന്നത്.
വ്യക്തികൾക്ക് സ്വന്തമായി സെറ്റ് ചെയ്യാവുന്ന ഹോം സ്ക്രീനിൽ, ഉപയോക്താക്കൾ ഗൂഗിൾ, ബിങ്, ഡക്ക് ഡക്ക് ഗോ, യാഹൂ തുടങ്ങിയ സെർച്ച് എഞ്ചിനുകൾ തെരഞ്ഞെടുക്കാനുള്ള സൗകര്യങ്ങളുമുണ്ട്. കൂടാതെ ഉപയോക്താക്കൾക്ക് വെബ് പേജുകൾ പിൻ ചെയ്ത് വെക്കാനുള്ള സംവിധാനവുമുണ്ട്. ഗൂഗിള്, ഫെയ്സ്ബുക്ക്, മൈക്രോസോഫ്റ്റ്, ഓപെര സോഫ്റ്റ് വെയര്, അഡോബി സിസ്റ്റംസ്, ഇന്റല്, ഐബിഎം, സാംസങ് എന്നിവയുമായി സഹകരിച്ചാണ് ജിയോ പേജസ് തയ്യാറാക്കിയിരിക്കുന്നത്.
