ദുബായ്: കൊല്‍ക്കത്ത നൈറ്റ് റൈഡേഴ്‌സിനെതിരെ ചെന്നൈ സൂപ്പര്‍ കിംഗ്‌സിന് 6 വിക്കറ്റ് ജയം. 173 റണ്‍സ് വിജയലക്ഷ്യവുമായി ബാറ്റിംഗ് ആരംഭിച്ച ചെന്നൈ അവസാന പന്തിലാണ് വിജയലക്ഷ്യം മറികടന്നത്. ഓപ്പണര്‍ ഋതുരാജ് ഗെയ്ക്വാദിന്റെ പ്രകടനമാണ് ചെന്നൈയുടെ വിജയത്തില്‍ നിര്‍ണായകമായത്.
ഷെയ്ന്‍ വാട്‌സണും(14) ഗെയ്ക്വാദും ഒന്നാം വിക്കറ്റില്‍ 50 റണ്‍സ് കൂട്ടിച്ചേര്‍ത്ത് ടീമിന് മികച്ച തുടക്കമാണ് നല്‍കിയത്. മൂന്നാമനായെത്തിയ അമ്പട്ടി റായ്ഡു 20 പന്തില്‍ 38 റണ്‍സ് നേടി. നായകന്‍ എം.എസ് ധോണി ഒരു റണ്‍സുമായി മടങ്ങിയപ്പോള്‍ ചെന്നൈ പരാജയം മണത്തു. സാം കറന്‍ താളം കണ്ടെത്താനാകാതെ സമ്മര്‍ദ്ദത്തിലായെങ്കിലും ഇന്നിംഗ്‌സിന്റെ നിയന്ത്രണം ഏറ്റെടുത്ത ജഡേജ 11 പന്തില്‍ 31 റണ്‍സ് നേടി പുറത്താകാതെ നിന്നു. രണ്ട് ബൗണ്ടറികളും മൂന്ന് സിക്‌സറുകളുമാണ് ജഡേജയുടെ ബാറ്റില്‍ നിന്നും പിറന്നത്. അവസാന രണ്ട് പന്തില്‍ ജയിക്കാന്‍ 7 റണ്‍സ് വേണമായിരുന്നു. രണ്ട് പന്തുകളും അതിര്‍ത്തി കടത്തിയാണ് ജഡേജ ചെന്നൈയുടെ വിജയം സൂപ്പറാക്കിയത്.
കൊല്‍ക്കത്തയ്‌ക്ക് വേണ്ടി പാറ്റ് കമ്മിന്‍സ്, വരുണ്‍ ചക്രവര്‍ത്തി എന്നിവര്‍ രണ്ട് വിക്കറ്റ് വീതം വീഴ്‌ത്തി. അതേസമയം, ജയിച്ചെങ്കിലും ചെന്നൈ പോയിന്റ് പട്ടികയില്‍ അവസാന സ്ഥാനത്ത് തുടരുകയാണ്. 13 കളികളില്‍ 6 ജയങ്ങളുമായി കൊല്‍ക്കത്ത അഞ്ചാം സ്ഥാനത്താണ്.
