സോറിയാസിസ് ഒരു ചര്മ്മ രോഗമാണ്. ശരീര ഭാഗങ്ങളില് അനുഭവപ്പെടുന്ന ചൊറിച്ചിലാണ് ഇതിന്റെ പ്രധാന ലക്ഷണം. ചര്മം തടിച്ച് വീര്ത്ത് ചുവന്നിരിക്കുക, തൊലി ഇളകിപ്പോകുക. ത്വക്കില് വിള്ളല് വീഴുക, തൊലിപ്പുറത്ത് ചെറിയ പാടുകള് ഉണ്ടാവുക. പാടുകള് ചെറിയ കുരുക്കളായി മാറുക. അവയില് നീറ്റല്, വേദന, ചൊറിച്ചില്, പഴുപ്പോ ചോരയോ പൊടിയുക, തുടങ്ങിയവയാണ് സോറിയാസിസിന്റെ മറ്റ് ലക്ഷണങ്ങള്. ഏതു പ്രായക്കാരിലും സോറിയാസിസ് ഉണ്ടാകാം എന്നാല് പതിനഞ്ചിനും ഇരുപത്തിയഞ്ചിനും ഇടയില് പ്രായമുള്ളവരിലാണ് കൂടുതലായി കണ്ടു വരുന്നത്.
പാരമ്പര്യമായും ഈ രോഗം കണ്ടു വരാറുണ്ട്. ക്രമാതീതമായി സാധാരണയിലും വേഗത്തില് ത്വക്കിലെ കോശങ്ങള് വിഭജിക്കപ്പെടുന്നതാണ് ഈ രോഗത്തിന് കാരണമായി കണക്കാക്കുന്നത്. 28 മുതല് 30 വരെ ദിവസങ്ങള് കൊണ്ട് വിഭജിക്കേണ്ട കോശങ്ങള് 3 മുതല് 7 വരെ ദിവസങ്ങള് കൊണ്ട് വിഭജിക്കുകയും ഇത് ആ ഭാഗത്തെ ത്വക്കിന് കട്ടികൂടി തൊലി ശല്കങ്ങളായി ഉരിഞ്ഞു പോകുന്നതിനു കാരണമാകുകയും ചെയ്യുന്നു. മഞ്ഞു കാലത്താണ് രോഗം കൂടുതലായി കണ്ടു വരുന്നത്. അതുകൊണ്ടു തന്നെ ശരീരത്തിന് വെയില് കൊള്ളിക്കുന്നത് ഈ രോഗത്തിന് ശമനം നല്കുന്നു. രോഗലക്ഷണങ്ങള്, അതിന്റെ കാഠിന്യം, അവ ബാധിക്കുന്ന ശരീര ഭാഗങ്ങള് എന്നിവ അനുസരിച്ച് സോറിയാസിസ് പലതരത്തില് കാണപ്പെടുന്നുണ്ട്. അവ ഏതാണെന്ന് മനലസ്സിലാക്കാം.
ഫ്ളെക്സറല് സോറിയാസിസ്
ശരീരത്തിലെ മടക്കുകളില് കാണപ്പെടുന്നതാണ് ഫ്ളെക്സറല് സോറിയാസിസ്. കൈകാല് മടക്കുകള്, കക്ഷം, അരയ്ക്കും തുടയ്ക്കുമിടയ്ക്ക്, സ്തനങ്ങളുടെ അടിഭാഗം എന്നിവിടങ്ങളിലാണ് ഇത് കൂടുതലായും ഉണ്ടാകുന്നത്. മടക്കുകളില് വിയര്പ്പും ചെളിയും അടിഞ്ഞുകൂടി അണുബാധയും ഫംഗസ് ബാധയും ഉണ്ടാകുന്നതാണ് ഈ അവസ്ഥയ്ക്കു കാരണം.
പസ്റ്റുലര് സോറിയാസിസ്
ശരീരത്തില് മുഴുവനായോ ചില ഭാഗങ്ങളില് മാത്രമായോ കാണപ്പെടുന്ന ഒന്നാണ് പസ്റ്റുലര് സോറിയാസിസ്. കൈകാല് മുട്ടുകളിലും പത്തികളിലും ചുവന്ന കുരുക്കള്പോലെ വന്ന് വ്യാപിച്ച് അതില് നിന്നും പഴുപ്പ് കുമിളകളായി വ്യാപിക്കുന്ന അവസ്ഥയാണിത്. കൃത്യ സമയത്തു ചികിത്സ നല്കാതിരുന്നാല് രോഗിയുടെ ജീവനുതന്നെ ഭീഷണി ആയേക്കാം.
പ്ലാക് സോറിയാസിസ്
ആളുകളില് പൊതുവേ കാണപ്പെടുന്ന ഒന്നാണ് പ്ലാക് സോറിയാസിസ്. സോറിയാസിസിലെ സാധാരണ രൂപമാണിത്. ചുവന്നു തടിച്ച പാടിനെ ആവരണം ചെയ്തുള്ള വെള്ള ശല്കങ്ങള് ഇതിന്റെ പ്രത്യേകതയാണ്. ഈ അവസ്ഥയിലാണ് തൊലി ശല്കങ്ങളായി ഇളകിപ്പോകുന്നത്. കൈകാല് മുട്ടുകള്, തലയോട്ടി, ശരീരത്തിന്റെ പുറംഭാഗം എന്നിവിടങ്ങളില് പ്ലാക് സോറിയാസിസ് കാണപ്പെടുന്നു.
ഗട്ടേറ്റ് സോറിയാസിസ്
ഒരു പ്രത്യേക ഭാഗം കേന്ദ്രീകരിച്ചോ വട്ടത്തിലുള്ള ചെറിയ കുത്തുകള് പോലെ ശരീരത്തില് മുഴുവനായോ ഗട്ടേറ്റ് സോറിയാസിസ് വരാം. ചിലപ്പോള് തലയോട്ടിയിലാവാം. ഗട്ടേറ്റ് സോറിയാസിസിന്റെ പാടുകള് തലയില് വേര്തിരിച്ചു കാണാന് സാധിക്കും. അണുബാധയോ വൈറസ്ബാധയോ ആണ് ഈ രോഗാവസ്ഥയ്ക്കു കാരണം. തൊണ്ട വേദനയും പനിയുമാണ് ഇതിന്റെ ലക്ഷണങ്ങള്.
എറിത്രോഡെര്മിക് സോറിയാസിസ്
സോറിയാസിസിന്റെ ഏറ്റവും വഷളാകുന്ന അവസ്ഥയാണ് എറിത്രോഡെര്മിക്. കടുത്ത ചൊറിച്ചിലും നീരും വേദനയുമായി തൊലി ചുവന്ന് ശല്കങ്ങളായി മുഴുവനായി ഉരിഞ്ഞുപോകുന്നു. മാരകമായ ഈ സോറിയാസിസിന് പെട്ടെന്നു തന്നെ ചികിത്സിക്കേണ്ടതാണ്.
നെയില് സോറിയാസിസ്
കൈകാല് നഖങ്ങളില് കുത്തുകള്പോലെ വന്ന് നഖത്തിനടിയിലെ തൊലിക്ക് കട്ടിവച്ചിരിക്കുന്ന അവസ്ഥയാണ് നെയില് സോറിയാസിസ്. നഖം പൊളിഞ്ഞിരിക്കുകയും കുഴിനഖം പോലെയും തോന്നാം. നഖത്തിന്റെ അഗ്രങ്ങളില് നിറവ്യത്യാസം ഉണ്ടാകുകയും ക്രമേണ സോറിയാസിസ് ബാധിച്ച നഖം ചുവന്ന് നശിച്ചു പോകുകയും ചെയ്യുന്നു.
Comments