ന്യൂഡല്ഹി: അമേരിക്കന് പ്രസിഡന്റ് തെരഞ്ഞെടുപ്പ് ഫലങ്ങള് ഇന്ത്യയുടെ വിദേശകാര്യ ബന്ധത്തെ ബാധിക്കില്ലെന്ന് ഹര്ഷവര്ദ്ധന് ഷ്രിംഗ്ല. ഇന്ത്യയും അമേരിക്കയും തമ്മിലുള്ള വിദേശകാര്യ-പ്രതിരോധ നയങ്ങള് ദീര്ഘകാലത്തെ മുന്നില്കണ്ടുള്ളതാണ്. അതിനാല് പ്രസിഡന്റ് മാറ്റം ഇന്ത്യ-അമേരിക്ക നയത്തെ ബാധിക്കില്ലെന്ന് വിദേശകാര്യ സെക്രട്ടറി പറഞ്ഞു. പ്രധാനമന്ത്രി നരേന്ദ്രമോദിയും ട്രംപും തമ്മിലെടുത്ത തീരുമാനങ്ങള് രാജ്യങ്ങളുടെ പൊതു വികസന നയത്തെ മുന് നിർത്തിയാണെന്നും ഷ്രിംഗ്ല പറഞ്ഞു.
അമേരിക്കയിലെ പാര്ലമെന്റും സെനറ്റും എല്ലാം ഒരു പോലെ അംഗീകരിച്ച ബന്ധമാണ് ഇന്ത്യയുമായുള്ളത്. സമീപകാലത്തെ സംഭവവികാസങ്ങള് മാത്രമല്ല അതിനെ സ്വാധീനി ക്കുന്നത്. അത് അമേരിക്കയിലെ എല്ലാ രാഷ്ട്രീയ നേതാക്കള്ക്കും ബോധ്യ മുള്ളതാണ്. ജനാധിപത്യ രാജ്യങ്ങളെന്ന നിലയില് ഇന്ത്യയും അമേരിക്കയും പങ്കുവയ്ക്കുന്ന ഒട്ടനവധി മൂല്യങ്ങളുണ്ട്. അത് രാജ്യങ്ങളെന്ന നിലയിലും മേഖലകളുടെ ബന്ധമെന്ന നിലയിലും ഒരു പോലെ പ്രധാനപ്പെട്ടതാണെന്നും ഷ്രിംഗ്ല വ്യക്തമാക്കി.
നിലവിലെ നയതന്ത്ര- വിദേശകാര്യ നയത്തില് പ്രധാനമന്ത്രി നരേന്ദ്രമോദിയുടെ ഇടപെടല് നിര്ണ്ണായകമാണ്. ട്രംപിനോടെന്ന പോലെ ഒബാമയോടും മോദിക്കുണ്ടായിരുന്ന വ്യക്തി ബന്ധം ശക്തമായിരുന്നുവെന്നും ഷ്രിംഗ്ല ഓര്മ്മിപ്പിച്ചു. ദീര്ഘകാലം അമേരിക്കയില് ഇന്ത്യയുടെ സ്ഥാനപതിയായി പ്രവര്ത്തിച്ച ഉദ്യോഗസ്ഥനാണ് വിദേശകാര്യ സെക്രട്ടറിയായ ഹര്ഷവര്ദ്ധന് ഷ്രിംഗ്ല.
