ശരീരത്തിന് ഉപകാരപ്രദമായ ഒരുപാട് ഗുണങ്ങള് അടങ്ങിയ ഒന്നാണ് പപ്പായ. വിറ്റാമിന് സിയാണ് പപ്പായയില് മുഖ്യമായി അടങ്ങിയിരിക്കുന്നത്. ഒപ്പം വിറ്റാമിന് എ, ഇ, കെ, ബി എന്നിവയും അടങ്ങിയിട്ടുണ്ട്. കൂടാതെ ഫൈബര്, കാത്സ്യം, മഗ്നീഷ്യം, പൊട്ടാസ്യം, കോപ്പര്, എന്നീ ധാതുക്കളും ധാരാളം മിനറല്സും ഇതില് അടങ്ങിയിട്ടുണ്ട്. ഇത് പച്ചയായും പഴുത്തും, കറിവെച്ചുമെല്ലാം കഴിക്കുന്നത് ആരോഗ്യത്തിന് വളരെ നല്ലതാണ്. ഇതെല്ലാം നാം ഇടയ്ക്കിടെ കഴിക്കാറുമുണ്ട്. എന്നാല് അവയില് നിന്നെല്ലാം വ്യത്യസ്തമായി പപ്പായ കൊണ്ട് ഒരു ഹലുവ ഉണ്ടാക്കി നോക്കിയാലോ… വളരെ സ്വാദിഷ്ടവും രുചികരവുമയ പപ്പായ ഹല്വ. ഇത് എങ്ങനെയാണ് തയ്യാറാക്കുന്നത് എന്ന് നോക്കാം.
ഇതിനായി ഒരു പച്ച പപ്പായ എടുത്തു തൊലിയും കുരുവും കളഞ്ഞ് നന്നായി ഗ്രേറ്റ് ചെയ്തു വയ്ക്കുക. കൂടാതെ ഒരു കപ്പ് ശര്ക്കരയും ഒരു കപ്പ് തേങ്ങാപാലും ആവശ്യത്തിന് നെയ്യും അണ്ടിപരിപ്പ്, മുന്തിരി, ഏലയ്ക്ക എന്നിവയും എടുക്കുക. ആദ്യമായി ഒരു പാന് അടുപ്പത്ത് വെച്ച് അതിലേക്ക് നാല് ടീസ് സ്പൂണ് നെയ്യ് ഒഴിച്ചു കൊടുക്കുക. നെയ്യ് നന്നായി ചൂടായി വരുമ്പോള് അതിലേക്ക് ഗ്രേറ്റ് ചെയ്തു വെച്ചിരിക്കുന്ന പപ്പായ ഇട്ടുകൊടുക്കുക. ഇത് നന്നായി ഇളക്കിയ ശേഷം തേങ്ങയുടെ പാല് ചേര്ത്ത് കൊടുക്കുക.
ഇത് ഒരു അഞ്ച് മിനിറ്റ് നേരം തീ കുറച്ച് മൂടി വേവിയ്ക്കുക. പപ്പായ നന്നായി വെന്ത് വരുമ്പോള് അതിലേയ്ക്ക് ശര്ക്കര നന്നായി പൊടിച്ചു ചേര്ത്ത് കൊടുക്കുക. ഇത് നന്നായി ഇളക്കി യോജിപ്പിച്ച് വരട്ടി എടുക്കണം. നെയ്യ് മുകളില് തെളിഞ്ഞു വരുന്നതു വരെ വരട്ടണം. ഈ സമയം ഇതിലേക്ക് കുറച്ച് ചേര്ത്ത് ഏലയ്ക്ക പൊടി കൂടി ചേര്ത്ത് കൊടുക്കുക. ഇത് നന്നായി ഇളക്കിയതിനു ശേഷം അണ്ടിപരിപ്പും മുന്തിരിയും നെയ്യില് വറുത്ത് ഇതില് ചേര്ത്തു കൊടുക്കുക. കുട്ടികള്ക്കും മുതിര്ന്നവര്ക്കും ഒരുപോലെ ഇഷ്ടപ്പെടുന്ന ഒരു വിഭവമാണ് ഈ പപ്പായ ഹല്വ.
Comments