ആപ്പിള് അതീവ രഹസ്യമായി നിര്മിച്ചിരുന്ന മിനി ഐപാഡ് 6 ന്റെ വിവരങ്ങള് ഓണ്ലൈനില് ചോര്ന്നു. ഐപാഡ് മിനി 6 ന്റെ സവിശേഷതകളും ഫീച്ചറുകളും ഉള്പ്പെടെയുള്ള വിവരങ്ങളാണ് ഓണ്ലൈനിലൂടെ പുറത്ത് വന്നിരിക്കുന്നത്. അടുത്ത വര്ഷം ആദ്യം ഐപാഡ് 9 നൊപ്പം ഐപാഡ് മിനി 6 പുറത്തിറക്കാനായിരുന്നു ആപ്പിളിന്റെ പദ്ധതി. പുതുതലമുറ ഐപാഡുകളായിട്ടാണ് ആപ്പിള് ഈ ഉല്പ്പന്നങ്ങളെ വിശേഷിപ്പിക്കുന്നത്.
മിനി 6 ന് ഐപാഡ് എയര് 4 മായി സാമ്യമുണ്ടെന്നാണ് ഓണ്ലൈനിലൂടെ പുറത്തുവന്ന റിപ്പോര്ട്ടുകള് വ്യക്തമാക്കുന്നത്. ഐഫോണ് 12 നോടും ഐപാഡ് എയറിനോടും സമാനമായ ബോക്സി ഡിസൈനായിരിക്കും മിനി 6 ന്. 8.5 ഇഞ്ച് ലിക്വിഡ് റെറ്റിന ഡിസ്പ്ലേയാണ് മിനി 6 ന്റെ മറ്റൊരു സവിശേഷത. നിലവിലെ ഐപാഡ് മിനിയില് ഉളളതുപോലെ സ്റ്റീരിയോ സ്പീക്കര് സംവിധാനവും പുതിയ പ്രോഡക്ടിലുണ്ടെന്നാണ് ചോര്ന്ന വിവരങ്ങളില് നിന്ന് വ്യക്തമാകുന്നത്.
രണ്ട് ബാറ്ററികളും യുഎസ്ബി ടൈപ്പ് സി പോര്ട്ടും ഉള്പ്പെടുത്തിയിട്ടുണ്ട്. ഐപാഡ് എയര് 4 ന്റെ അതേ ക്യാമറകള് തന്നെയായായിരിക്കും മിനി 6 ന് ഉണ്ടായിരിക്കുക. ആപ്പിള് പെന്സില് 2 സപ്പോര്ട്ടും ബയോണിക് ചിപ്സെറ്റും ഐപാഡ് മിനി 6 യില് ഉണ്ടാകുമെന്നാണ് സൂചന.
മിനി 6 ന്റെ ലോഞ്ചിംഗിനെക്കുറിച്ചോ മറ്റ് സവിശേഷകളെക്കുറിച്ചോ ആപ്പിള് ഇതുവരെ ഔദ്യോഗിക സ്ഥിരീകരണങ്ങളൊന്നും നടത്തിയിരുന്നില്ല. ഇതിനിടയിലാണ് വിവരങ്ങള് ഓണ്ലൈനില് ചോര്ന്നത്.
