ഭൂമിയിൽ സ്വർണ്ണം എത്തുന്നത് എവിടെ നിന്നാണ്. ചിലയിടങ്ങളിൽ മാത്രം എങ്ങനെയാണ് സ്വർണ്ണഖനി ഉണ്ടായത്. എപ്പോഴെങ്കിലുമൊക്കെ ഇത്തരമൊരു സംശയം നമ്മളിൽ പലർക്കും ഉണ്ടായിട്ടുണ്ട്. സ്വർണ്ണത്തിന്റെ ഭൂമിയിലെ ഉത്ഭവം എവിടെ നിന്നാണെന്നതിനെ കുറിച്ച് വ്യക്തത തേടുന്നതിനായി ശാസ്ത്രലോകം ഇപ്പോഴും ഗവേഷണം തുടരുകയാണ്. പല പഠനങ്ങളും ഇത് സംബന്ധിച്ച് നടക്കുന്നുണ്ട്. അത്തരത്തിൽ നടത്തിയ ഒരു പഠനത്തിലെ നിർണായക കണ്ടെത്തലുകളാണ് വീണ്ടും ചർച്ചയാകുന്നത്. നേച്ചർ കമ്മ്യൂണിക്കേഷൻസ് ജേണലിൽ ഇത് സംബന്ധിച്ച റിപ്പോർട്ടും പ്രസിദ്ധീകരിച്ചിട്ടുണ്ട്.
ഭൂമിയുടെ ഏറ്റവും പുറമെയുള്ള പാളിയായ ഭൂവൽക്കത്തിലാണ് സ്വർണ്ണം കാണപ്പെടുന്നത്. 40 കിലോമീറ്റർ വരെ വ്യാപിച്ചിരിക്കുന്ന പാളിയാണ് ഭൂവൽക്കം. ഭൂവൽക്കത്തിന് താഴെ ഏകദേശം 2900 കിലോമീറ്റർ കനമുള്ള പാളിയായ മാന്റിലിൽ ഉണ്ടാകുന്ന മാറ്റങ്ങളാണ് ഭൂവൽക്കത്തിലേക്ക് സ്വർണ്ണം എത്താൻ പ്രധാന കാരണമമെന്നാണ് ഗവേഷകർ പഠനത്തിൽ വ്യക്തമാക്കുന്നത്.
രണ്ടു ന്യൂട്രോൺ നക്ഷത്രങ്ങളുടെ കൂട്ടിയിടിയിൽ നിന്നാണ് ഭൂമിയിൽ സ്വർണ്ണം രൂപപ്പെട്ടതെന്നും, അതല്ല തമോഗർത്തം ന്യൂട്രോൺ നക്ഷത്രത്തെ വിഴുങ്ങുന്ന പ്രക്രിയയ്ക്കിടെയാണ് സ്വർണ്ണം ഉണ്ടായതെന്നും പറയപ്പെടുന്നുണ്ട്. ലഘു മൂലകങ്ങൾ കൂടിച്ചേർന്ന് ഘന മൂലകങ്ങളായി മാറാനുള്ള എല്ലാ സാഹചര്യങ്ങളും ഈ പ്രക്രിയകൾക്കിടയിൽ ഉണ്ടാകുന്നതിനാലാണ് ഗവേഷകർ ഇത്തരത്തിൽ ഒരു നിഗമനത്തിലെത്തിയത്.
450 കോടി വർഷങ്ങൾക്ക് മുൻപ് ഭൂമി രൂപപ്പെടുമ്പോൾ തന്നെ സ്വർണ്ണം ഉണ്ടായിരുന്നുവെന്നും വിലയിരുത്തപ്പെടുന്നു. ആ സമയം ഭൂമി ചുട്ടു പഴുത്ത അവസ്ഥയിലായിരുന്നതിനാൽ ഘനമൂലകമായ സ്വർണ്ണം ഉരുകിയ നിലയിൽ ഭൂമിയുടെ അടിത്തട്ടിലേക്ക് പോയി. 400 കോടി വർഷങ്ങൾക്ക് മുൻപ് ഛിന്ന ഗ്രഹങ്ങൾ തുടരെ ഭൂമിയിലേക്ക് പതിച്ച ലേറ്റ് ഹെവി ബംബാഡ്മെന്റ് എന്ന പ്രതിഭാസം ഉണ്ടായിരുന്നു. ഈ പ്രതിഭാസത്തെ തുടർന്നാണ് ഭൂമിയുടെ അടിത്തട്ടിൽ നിന്നും സ്വർണ്ണം ഉൾപ്പെടെയുള്ളവ മാന്റിലിലേക്കും ഭൂവൽക്കത്തിലേക്കും എത്തുന്നത്. അങ്ങനെയെത്തപ്പെട്ട സ്വർണ്ണമാണ് ലോകത്തിന്റെ വിവിധ ഭാഗങ്ങളിൽ നിന്നും ഇന്ന് കുഴിച്ചെടുക്കപ്പെടുന്നവയിലേറെയുമെന്നാണ് പഠനത്തിൽ വ്യക്തമാക്കുന്നത്.
അർജന്റീനിയൻ പാറ്റഗോണിയയെ കേന്ദ്രീകരിച്ചാണ് പുതിയ ഗവേഷണം നടന്നത്. മാന്റലുകളിലുള്ള വിള്ളലുകളാണ് ഭൂവൽക്കത്തിലേക്ക് സ്വർണ്ണമെത്തിക്കുന്നതെന്ന് ഈ മേഖലകളിലെ പരിശോധനയിൽ തെളിഞ്ഞിട്ടുണ്ട്. അതേസമയം ഭൂമിയിലെ എല്ലായിടത്തും മാന്റലിൽ ഇത്തരം വിള്ളലുകൾ ഉണ്ടാകില്ല. മാന്റലിൽ വിള്ളലുകൾ ഉണ്ടായിരിക്കുന്ന സ്ഥലങ്ങൾ സ്വർണ്ണഖനനത്തിന് പേര് കേട്ടവയാണ്.
ഈ കണ്ടെത്തലിന് ശക്തി പകരുന്ന തെളിവും ഗവേഷകർ മുന്നോട്ട് വെയ്ക്കുന്നുണ്ട്. ആഫ്രിക്കയിലും തെക്കേ അമേരിക്കയിലുമാണ് ഇന്ന് ലോകത്തെ ഏറ്റവും പ്രധാന സ്വർണ്ണ ഖനന മേഖലകൾ. സൂപ്പർ കോണ്ടിനന്റ് ഗോണ്ട്വാനയുടെ ഭാഗമായിരുന്ന ഇവയ്ക്കിടെയിലൂടെ മാന്റിലിലുണ്ടായ കൂറ്റൻ വിള്ളലാണ് ഇവയെ രണ്ടു വൻകരകളാക്കി മാറ്റാൻ കാരണമായത്. അതുവഴി ഉരുകിയൊലിച്ചെത്തി ഭൂവൽക്കത്തിൽ പരന്ന ലാവയിലായിരിക്കാം സ്വർണ്ണത്തെയും എത്തിച്ചതെന്നും പഠനത്തിന് നേതൃത്വം നൽകിയ ഗവേഷകൻ ഗോൺസാലസ് ജെമനസ് വ്യക്തമാക്കി.
പലതരം മൂലകങ്ങൾ നിറഞ്ഞ മാന്റിലിൽ പിന്നീട് സ്വർണ്ണം രൂപീകൃതമായെന്നും പഠനത്തിൽ വിലയിരുത്തുന്നു. ടെക്ടോണിക് ഫലങ്ങളുടെ ചലനത്തിലൂടെയും സ്വർണ്ണം ഉൾപ്പെടെയുള്ള ലോഹങ്ങൾ ഭൂവൽക്കത്തിൽ എത്തിച്ചേർന്നിട്ടുണ്ട്. ഗവേഷണത്തിന്റെ ഭാഗമായി മാന്റിലിൽ നിന്നുള്ള സെനോലിത് ഘടകങ്ങൾ ഗവേഷകർ പരിശോധനയ്ക്ക് വിധേയമാക്കി. അഗ്നി പർവ്വത സ്ഫോടനങ്ങളിലൂടെ ഭൂവൽക്കത്തിലേക്കെത്തിയ ഇവയിൽ സ്വർണ്ണത്തിന്റെ സാന്നിദ്ധ്യം കണ്ടെത്തിയിട്ടുണ്ട്.
