ആൻഡ്രോയ്ഡ് ഫോണുകളിൽ ഏറ്റവും കൂടുതൽ മാൽവെയറുകളെത്തുന്നത് ഗൂഗിൾ പ്ലേസ്റ്റോറിൽ നിന്നാണെന്ന് റിപ്പോർട്ട്. സൈബർ സെക്യൂരിറ്റി കമ്പനിയായ നോർട്ടൺ ലൈഫ് ലോക്കും സ്പെയ്നിലെ ഐഎംഡിഇഎ സോഫ്റ്റ് വെയർ ഇൻസ്റ്റിറ്റ്യൂട്ടും ചേർന്ന് നടത്തിയ പഠനത്തിലാണ് ഇക്കാര്യം വ്യക്തമാക്കിയിരിക്കുന്നത്. 12 മില്യൺ ആൻഡ്രോയ്ഡ് ഡിവൈസുകളിൽ നിന്നുള്ള 7.9 മില്യൺ ആപ്പുകളുടെ ഡാറ്റ ഉപയോഗിച്ച് നടത്തിയ പഠനത്തിന്റെ അടിസ്ഥാനത്തിലാണ് റിപ്പോർട്ട് പ്രസിദ്ധീകരിച്ചിരിക്കുന്നത്.
ഫോണിലേയ്ക്കെത്തുന്ന മാൽവെയറുകളിൽ 67.2 ശതമാനവും പ്ലേസ്റ്റോറിൽ നിന്നും ഇൻസ്റ്റാൾ ചെയ്യുന്ന ആപ്പുകൾ വഴിയാണെന്ന് പഠനത്തിൽ വ്യക്തമാക്കുന്നു. ആപ്ലിക്കേഷനുകൾ ഡൗൺലോഡ് ചെയ്യാനായി ആളുകൾ കൂടുതലായും ആശ്രയിക്കുന്നത് ഗൂഗിൾ പ്ലേസ്റ്റോറിനെയാണ്. ഇത്രത്തോളം മാൽവെയറുകൾ ഉണ്ടാകാനുള്ള കാരണം ഇതാണെന്നും പഠനത്തിൽ വിശദമാക്കുന്നുണ്ട്.
പ്ലേ സ്റ്റോറിന് പുറത്ത് നിന്നും ഡൗൺലോഡ് ചെയ്യുന്ന ആപ്പുകൾ വഴി ഒരു ആൻഡ്രോയ്ഡ് ഫോണിൽ 10.4 ശതമാനം മാൽവെയറാണ് എത്തുന്നത്. പ്ലേസ്റ്റോർ ആപ്പ് ഡൗൺലോഡറുകൾ, മറ്റ് ആൻഡ്രോയ്ഡ് മാർക്കറ്റിൽ നിന്നുള്ള ഡൗൺലോഡറുകൾ, വെബ് ബ്രൗസറുകൾ എന്നിങ്ങനെ ഏഴ് കാര്യങ്ങൾ പരിഗണിച്ചാണ് പഠനം നടത്തിയിരിക്കുന്നത്. ആൻഡ്രോയ്ഡ് ഫോണുകളിലെ ആപ്പുകളിൽ 87.2 ശതമാനം ആപ്പുകളും പ്ലേസ്റ്റോറിൽ നിന്നും തന്നെയാണ് ഡൗൺ ലോഡ് ചെയ്യപ്പെടുന്നത്. 10 മുതൽ 24 ശതമാനം വരെയുള്ള ഫോണുകളിൽ ഉപയോഗം ഇല്ലാത്ത ഒരു ആപ്ലിക്കേഷനെങ്കിലും ഡൗൺലോഡ് ചെയ്തിട്ടുണ്ടെന്നും പഠനത്തിൽ പറയുന്നു.
Comments