സിഡ്‌നി: ഇന്ത്യയുടെ കൊറോണ കാലത്തെ ആദ്യ അന്താരാഷ്‌ട്ര ക്രിക്കറ്റ് പരമ്പരയ്ക്ക് ഇന്ന് തുടക്കം. കരുത്തരായ ഓസ്‌ട്രേലിയക്കെതിരെ അവരുടെ മണ്ണിലെ പോരാട്ടമാണ് ഏകദിനങ്ങളോടെ ആരംഭിക്കുന്നത്. സിഡ്‌നിയിലാണ് ഇന്ന് പകലും രാത്രിയിലുമായുള്ള മത്സരം ആരംഭിക്കുന്നത്. വിരാട് കോഹ്‌ലിയുടെ നേതൃത്വത്തിലിറങ്ങുന്ന ടീമില്‍ രോഹിത് ശര്‍മ്മയുടെ അഭാവമാണ് ഏറെ നിര്‍ണ്ണായകമാകുന്നത്.മൂന്ന് ഏകദിനങ്ങളും മൂന്ന് ടി20കളും നാല് ടെസ്റ്റുകളുമാണ് പരമ്പരയിലുള്ളത്.
ഏകദിനത്തില്‍ ഇന്ത്യന്‍ ബൗളിംഗ് നിരയിലേക്ക് നവ്ദീപ് സെയ്‌നിക്ക് ഒപ്പം ടി.നടരാജനേയും പരിഗണിച്ചിരിക്കുന്നു എന്നതാണ് പുതിയ സൂചന.വരുണ്‍ ചക്രവര്‍ത്തിയുടെ പരിക്കാണ് നടരാജന് ടീമില്‍ അവസാന നിമിഷം ഇടം ലഭിച്ചത്. ടി20 സ്‌ക്വാഡിലുള്ള നടരാജിന് അന്താരാഷ്‌ട്ര ഏകദിനത്തില്‍ അപ്രതീക്ഷിത അവസരമാണ് ലഭിച്ചിരിക്കുന്നത്. 71 യോര്‍ക്കറുകളെറിഞ്ഞ് ഐ.പി.എല്ലില്‍ തരംഗമായ സണ്‍റൈസേഴ്‌സ് ഹൈദരാബാദിന്റെ താരമാണ് നടരാജന്.
യുവതാരങ്ങളില്‍ തന്നെയാണ് കോഹ്ലിക്ക് പ്രതീക്ഷ. ബാറ്റിംഗില്‍ കെ.എല്‍.രാഹുല്‍ തന്നെയാണ് നെടുംതൂണ്‍. യുവരാജിന്റെ പകരക്കാരനെന്ന് വിശേഷിപ്പിക്കുന്ന ശ്രേയസ്സ് അയ്യര്‍ക്കൊപ്പം ഓസ്‌ട്രേലിയയില്‍ തകര്‍പ്പന്‍ പ്രകടനം കാഴ്ചവെച്ചിട്ടുള്ള ഋഷഭ് പന്തിലുമാണ് ആരാധക പ്രതീക്ഷ. ഓപ്പണര്‍മാരായി ശിഖര്‍ ധവാനും മായങ്കും ഇറങ്ങും. രവീന്ദ്ര ജഡേജ, ഹാര്‍ദ്ദിക് പാണ്ഡ്യ എന്നിവരാണ് മറ്റ് ബാറ്റ്‌സ്മാന്‍മാര്. ബൂംറ നയിക്കുന്ന ബൗളിംഗ് നിരയില് മുഹമ്മദ് ഷമിയുടെ അനുഭവ സമ്പത്ത് വലിയ കരുത്താകും. നവദീപ് സെയ്‌നിക്കൊപ്പം യുസ്വേന്ദ്ര ചഹലിന്റെ അവസരോചിത ബൗളിംഗും മികച്ചതായാല്‍ ഓസീസ് മണ്ണില്‍ ഇന്ത്യ വിജയക്കൊടി പാറിക്കും.
