ബാഴ്‌സലോണ: സ്പാനിഷ് ലീഗില്‍ ശക്തമായ തിരിച്ചുവരവ് ലക്ഷ്യമിട്ട് ബാഴ്‌സലോണ ഇന്ന് ഇറങ്ങുന്നു. ഒസാസുനയാണ് എതിരാളികള്‍. ഇന്ത്യന്‍ സമയം വൈകീട്ട് 6.30നാണ് മത്സരം ആരംഭിക്കുക.
ഏറെ പ്രതിസന്ധികള്‍ അതിജീവിച്ചാണ് ബാഴ്‌സലോണ മുന്നോട്ട് പോകുന്നത്. സൂപ്പര്‍ താരം ലയണല്‍ മെസി ഫോമിലേയ്‌ക്ക് ഉയര്‍ന്നിട്ടില്ല. ടീമും മാനേജ്‌മെന്റും തമ്മിലുള്ള സ്വരച്ചേര്‍ച്ച ഇല്ലായ്മ പ്രകടനത്തിലും കാര്യമായി നിഴലിയ്‌ക്കുന്നുണ്ട്. സീസണിലെ ഒന്‍പതാം മത്സരത്തിന് ഇറങ്ങുന്ന ബാഴ്‌സലോണ പോയിന്റ് പട്ടികയില്‍ 13-ാം സ്ഥാനത്താണ്. മൂന്ന് കളികളില്‍ മാത്രമാണ് ടീം വിജയം കണ്ടത്. മറഡോണയുടെ വിയോഗത്തിന് പിന്നാലെ കളത്തിലിറങ്ങുന്ന ബാഴ്‌സലോണ മുന്‍ ഇതിഹാസ താരത്തിന് അര്‍ഹിക്കുന്ന ആദരം നല്‍കുമെന്ന് കോച്ച് റൊണാള്‍ഡ് കൂമാന്‍ പറഞ്ഞു.
അതേസമയം, നിലവിലെ ചാമ്പ്യന്‍മാരായ റയല്‍ മാഡ്രിഡ് അലാവസിന് മുന്നില്‍ അടിയറവ് പറഞ്ഞു. ഒന്നിനെതിരെ രണ്ട് ഗോളുകള്‍ക്കായിരുന്നു അലാവസിന്റെ ജയം. 5-ാം മിനിട്ടില്‍ പെരസും 49-ാം മിനിട്ടില്‍ ജൊസോലുവുമാണ് റയലിന്റെ വല കുലുക്കിയത്. 86-ാം മിനിട്ടില്‍ കസമിറോയാണ് റയലിന്റെ ആശ്വാസ ഗോള്‍ നേടിയത്. 10 മത്സരങ്ങള്‍ പൂര്‍ത്തിയാക്കിയ റയല്‍ നാലാം സ്ഥാനത്താണ്.
