ആരോഗ്യത്തിന് ഏറെ ഉത്തമമായ ഒന്നാണ് വെജിറ്റബിള് സൂപ്പ്. ശരീരഭാരം കുറയ്ക്കുന്നതിനും പ്രമേഹം, രക്തസമ്മര്ദ്ദം, കൊളസ്ട്രോള് എന്നീ അസുഖങ്ങള് നിയന്ത്രിക്കുന്നതിനും നിത്യേന വെജിറ്റബിള് സൂപ്പ് കഴിക്കുന്നത് വളരെ ഉത്തമമാണ്. കൂടാതെ പ്രതിരോധ ശേഷി കൂട്ടാനും ഇത് ഏറെ സഹായിക്കുന്നു. സ്വാദിഷ്ടവും ആരോഗ്യകരവുമായ വെജിറ്റബിള് സൂപ്പ് എങ്ങനെയാണ് തയ്യാറാക്കുന്നത് എന്ന് നോക്കാം. ഇതിനായി ഒരു പാന് അടുപ്പില് വെച്ച് അതിലേക്ക് ഒരു ടീസ്പൂണ് ബട്ടര് അല്ലെങ്കില് ഏതെങ്കിലും റിഫൈന്ഡ് ഓയില് ഒഴിക്കുക. ഇത് നന്നായി ചൂടായ ശേഷം അതിലേക്ക് ഒരു ടീസ്പൂണ് വെളുത്തുള്ളി അരിഞ്ഞ് ചേര്ക്കുക.
ശേഷം ഇതിലേക്ക് കാല്കപ്പ് സവാള കൂടി ചേര്ത്ത് നന്നായി വഴറ്റിയെടുക്കുക. അതിനു ശേഷം അര കപ്പ് ക്യാരറ്റ്, ക്യാബേജ്, മഷ്റൂം, ബീന്സ് എന്നിവ ചേര്ത്ത് നന്നായി ഇളക്കുക. ഇത് നന്നായി വാടി കഴിഞ്ഞ ശേഷം അതിലേക്ക് അരക്കപ്പ് ചോളം കൂടി ചേര്ത്ത് നന്നായി ഇളക്കി കൊടുക്കുക. ശേഷം ആവശ്യത്തിനു വെള്ളം ഒഴിച്ചു കൊടുക്കുക. പിന്നീട് പതിനഞ്ച് മിനിറ്റ് മൂടി വെച്ച് വേവിക്കുക. ശേഷം മൂടി തുറന്ന് ഇതിലേക്ക് കാല് ടീസ്പൂണ് കുരുമുളകു പൊടിയും ആവശ്യത്തിന് ഉപ്പും അല്പം മല്ലിയിലയും ചേര്ത്ത് കൊടുക്കുക.
ഇത് നന്നായി ഇളക്കി അഞ്ച് മിനിറ്റ് തിളപ്പിച്ചെടുക്കുക. ഇതിലേക്ക് കാല്ക്കപ്പ് വെള്ളത്തില് അര ടീസ്പൂണ് കോണ്ഫ്ലവര് കലക്കി ഒഴിച്ചു കൊടുക്കുക. ഇത് നന്നായി തിളച്ച ശേഷം ഓഫ് ചെയ്ത് ഇതിലേക്ക് ഒരു ചെറുനാരങ്ങയുടെ നീര് കൂടി ചേര്ത്ത് കൊടുക്കുക. ആരോഗ്യകരവും സ്വാദിഷ്ടവുമായ വെജിറ്റബിള് സൂപ്പ് തയ്യാര്. ശരീരഭാരം കുറയ്ക്കുന്നവര്ക്ക് രാത്രി കഴിക്കാവുന്ന ആരോഗ്യകരമായ ഒന്നാണ് ഈ വെജിറ്റബിള് സൂപ്പ്.
