അച്ചാര് ഇഷ്ടപ്പെടാത്തവരും കഴിക്കാത്തവരുമായ ആളുകള് കുറവായിരിക്കും. മലയാളിയുടെ ഇഷ്ട വിഭവങ്ങളിലൊന്നാണിത്. വിവിധ തരത്തിലുള്ള അച്ചാറുകള് ഉണ്ടെങ്കിലും കടുതലായി കണ്ടു വരുന്നത് നാരങ്ങ അച്ചാറാണ്. എന്നാല് ഈ നാരങ്ങ അച്ചാറില് ഒരു വെറൈറ്റി ആയാലോ…. വളരെ സ്വാദിഷ്ടവും കൂടുതല് കാലം കേടുകൂടാതിരിക്കുന്നതുമായ ഒന്നാണ് വറുത്ത നാരങ്ങ അച്ചാര്. ഇത് തയ്യാറാക്കുന്നതിനായി ആദ്യം ഒരു കിലോ ചെറുനാരങ്ങ നന്നായി കഴുകി തുടച്ച് ഈര്പ്പം ഇല്ലാതെ മാറ്റിവയ്ക്കുക. പിന്നീട് ഒരു അടി കട്ടിയുള്ള പാത്രം അടുപ്പില് വെച്ച് അത് നന്നായി ചൂടാകുമ്പോള് അതിലേക്ക് 100 ഗ്രാം നല്ലെണ്ണ ഒഴിച്ചു കൊടുക്കുക. ഇത് നന്നായി ചൂടായി വരുമ്പോള് അതിലേക്ക് നേരത്തെ വൃത്തിയാക്കി വച്ചിരിക്കുന്ന ചെറുനാരങ്ങ ഇട്ട് നന്നായി വഴറ്റി എടുക്കണം.
ഇരുപത്തിയഞ്ച് മിനിറ്റോളം ഇത് നന്നായി ചൂടാക്കണം. ഏകദേശം കറുപ്പ് നിറം വന്നു തുടങ്ങുന്ന സമയം ഓഫാക്കുക. തണുത്തതിനു ശേഷം ഓരോന്നായി തുടച്ച് എടുക്കണം. ശേഷം അടി കട്ടിയുള്ള ഒരു പാത്രം അടുപ്പില് വെച്ച് അതിലേക്ക് നല്ലെണ്ണ ഒഴിച്ചു കൊടുത്ത് അത് ചൂടായി തുടങ്ങുമ്പോള് തീ ഓഫ് ചെയ്യുക. എന്നിട്ട് അതിലേക്ക് ഒരു ടേബിള് സ്പൂണ് മല്ലിപ്പൊടി, ഒരു ടേബിള് ടീസ്പൂണ് കായപ്പൊടി, അല്പം ശര്ക്കര പൊടിച്ചത്, 100 ഗ്രാം മുളകുപൊടി, ആവശ്യത്തിന് ഉപ്പ് എന്നിവ ചേര്ത്ത് നന്നായി യോജിപ്പിച്ചെടുക്കണം.
ശേഷം ഇതിലേക്ക് അരിഞ്ഞു വെച്ചിരിക്കുന്ന നാരങ്ങ കൂടി ചേര്ക്കുക. രണ്ടോ നാലോ കഷണങ്ങളാക്കി വേണം നാരങ്ങ അരിഞ്ഞ് എടുക്കാന്. വറുത്തെടുത്ത് നാരങ്ങ ആയതിനാല് അധികം ചെറുതാക്കിയാല് ഇത് അലിഞ്ഞു പോകും. ഇവ നന്നായി യോജിപ്പിച്ച ശേഷം ഭരണിയിലോ ഏതെങ്കിലും കുപ്പി പാത്രത്തിലോ ഇട്ട് നന്നായി അടച്ചു വെക്കുക. ഏകദേശം പതിനഞ്ച് ദിവസത്തിനു ശേഷം ഇത് എടുത്ത് ഉപയോഗിക്കാവുന്നതാണ്. വളരെ സ്വാദിഷ്ടവും അതോടൊപ്പം തന്നെ ഏറെ കാലം കേടുകൂടാതെ ഇരിക്കുകയും ചെയ്യുന്ന ഒന്നാണ് ഒരു വിഭവമാണ് വറുത്ത നാരങ്ങ അച്ചാര്.
