ക്രൈസ്റ്റ്ചര്‍ച്ച്: കൊറോണ മാനദണ്ഡങ്ങള്‍ പാലിക്കാതെ കറങ്ങിനടന്നതിന്റെ പേരില്‍ നിര്‍ബന്ധിത ക്വാറന്റൈനില്‍ ആക്കപ്പെട്ട പാക് ക്രിക്കറ്റ് സംഘത്തിന് ഒടുവില്‍ ആശ്വാസം. കര്‍ശന വ്യവസ്ഥകളോടെ ന്യൂസിലാന്റ് ആരോഗ്യവകുപ്പ് കൊണ്ടുവന്ന നിയന്ത്രങ്ങള്‍ ഈ ആഴ്ച പിന്‍വലിക്കും. ആകെ 52 പേരടങ്ങുന്ന പാക് ക്രിക്കറ്റ് ടീം കിവികള്‍ക്കെതിരെ പരമ്പരയ്‌ക്കായിട്ടാണ് ക്രൈസ്റ്റ്ചര്‍ച്ചിലെത്തിയത്.
വിദേശപൗരന്മാര്‍ എത്തിയാല്‍ താമസിക്കുന്ന ഹോട്ടലിലെ പ്രത്യേക റൂമുകളില്‍ നിന്നും പുറത്തിറങ്ങരുതെന്ന ചട്ടം ക്രിക്കറ്റ് താരങ്ങള്‍ ലംഘിച്ചതോടെയാണ് ആരോഗ്യവകുപ്പ് ഇടപെട്ടത്. ഹോട്ടലധികൃതരുടെ നിര്‍ദ്ദേശങ്ങള്‍ പാലിക്കാതെ പലരും പൊതു റസ്റ്റോറന്റിലും ഹോട്ടല്‍ പരിസരത്തും പുറത്തും കറങ്ങി നടന്നതോടെ പ്രശ്‌നം ഗൗരവമായി ഭരണകൂടം ഏറ്റെടുത്തു. തുടര്‍ന്ന് നടന്ന പരിശോധനയില്‍ 7 പേര്‍ക്ക് ആദ്യ ഘട്ടത്തിലും മൂന്ന് പേര്‍ക്ക് രണ്ടാം ഘട്ടത്തിലും കൊറോണ സ്ഥിരീകരിച്ചിരുന്നു.
നിയന്ത്രണങ്ങള്‍ കടുപ്പിച്ചതോടെ പാകിസ്താന്‍ വിഷയം രാഷ്‌ട്രീയമായി എടുത്തതോടെ ന്യൂസിലാന്റും നടപടി കടുപ്പിച്ചു. ഒരാള്‍ക്കുകൂടി കൊറോണ സ്ഥിരീകരിച്ചാല്‍ മുഴുവന്‍ പാക് സംഘത്തേയും നാട്ടിലേയ്‌ക്ക് വിമാനം കയറ്റുമെന്ന നിലപാടിലേയ്‌ക്കും പ്രധാനമന്ത്രി ജസീന്ത ആര്‍ഡേണ്‍ മാറിയതോടെ പാകിസ്താന്‍ മുട്ടുമടക്കുകയായിരുന്നു. പരമ്പരയിലെ ആദ്യമത്സരം ഈ മാസം 18-ാം തിയതി ടി20യോടെ ആരംഭിക്കും.
