ലോക സമ്പന്നരുടെ പട്ടികയില് ഈലോണ് മസ്ക് ഒന്നാം സ്ഥാനത്ത്. അമേരിക്കന് മാദ്ധ്യമസ്ഥാപനമായ ബ്ലൂംബെര്ഗ് പുറത്തുവിട്ട 500 ലോക സമ്പന്നരുടെ പട്ടികയിലാണ് അമേരിക്കന് ഇലക്ട്രിക്ക് കാര് കമ്പനിയായ ടെസ്ലയുടെ സി.ഇ.ഒ ആയ ഈലോണ് മസ്ക് ഒന്നാമത് എത്തിയത്. 188 ബില്യണ് ഡോളറാണ് നിലവിലെ കണക്കു പ്രകാരം ഈലോണ് മസ്കിന്റെ ആസ്തി. ആമസോണ് സി.ഇ.ഒ ആയ ജെഫ് ബെസോസയെ മറികടന്നാണ് ഈലോണ് മസ്ക് ഈ വലിയ നേട്ടം സ്വന്തമാക്കിയിരിക്കുന്നത്. 2017 ഒക്ടോബര് മുതല് ലോക സമ്പന്നരുടെ പട്ടികയില് ഒന്നാം സ്ഥാനത്ത് ജെഫ് ബെസോസ് ആയിരുന്നു. ജെഫ് ബെസോസയെക്കാള് 1.5 ഡോളര് അധികമാണ് ഈലോണ് മസ്കിന്റെ ആസ്തി.
ടെസ്ലയുടെ വിഹിത ലാഭത്തില് 743 ശതമാനവും ഈലോണിന്റെ ആസ്തിയില് 150 ബില്യണ് ഡോളറിന്റെ ഉയര്ച്ചയുമാണ് കഴിഞ്ഞ വര്ഷം ഉണ്ടായിരിക്കുന്നത്. ഈ വര്ദ്ധനവാണ് പട്ടികയില് ഒന്നാമതെത്താന് കാരണമായതും. വെറും പത്ത് ശതമാനം വിജയ സാധ്യത മാത്രം കണക്കിലെടുത്താണ് ടെസ്ല എന്ന പേരില് ഈ വാഹന കമ്പനി ആരംഭിച്ചത്. എന്നാല് ഈ സംരംഭത്തിന് ഇത്രത്തോളം വളര്ച്ച കൈവരിക്കാന് സാധിക്കും എന്ന് താന് കരുതിയിരുന്നില്ല എന്നും ഈ നേട്ടത്തില് വളരെ അധികം അഭിമാനമുണ്ട് എന്നും ഈലോണ് മസ്ക് ട്വിറ്ററില് കുറിച്ചു.
ടെസ്ലയുടെ കഴിഞ്ഞ വര്ഷത്തെ ടാര്ഗറ്റ് അഞ്ച് കോടി വാഹനങ്ങള് ആയിരുന്നു. എന്നാല് ആ ടാര്ഗറ്റ് പൂര്ണ്ണമായും കൈവരിക്കാന് സാധിച്ചില്ലെങ്കിലും കഴിഞ്ഞ വര്ഷം 4,99,550 വാഹനങ്ങള് ടെസ്ല വില്ക്കുകയുണ്ടായി. അടുത്ത വര്ഷങ്ങളില് ഇരുപത് മില്യണ് വീതം വളര്ച്ച നേടാന് സാധികുമെന്നാണ് മസ്ക് ഈലോണ് പറയുന്നത്. ദക്ഷിണാഫ്രിക്കയില് ജനിച്ച ഈലോണ് മസ്ക് ബഹിരാകാശ രംഗത്തെ സ്വകാര്യ കമ്പനിയായ സ്പേസ് എക്സിന്റെയും സ്ഥാപകനാണ്.
