ലണ്ടൻ: ഓസീസിനെ തറപറ്റിച്ച ടീം ഇന്ത്യയെ ബഹുമാനിച്ചില്ലെങ്കിൽ തോൽവി ഉറപ്പെന്ന ഉപദേശവുമായി മുൻ ഇംഗ്ലണ്ട് ക്യാപ്റ്റൻ കെവിൻ പീറ്റേഴ്സൺ. ഇംഗ്ലണ്ട് ഏറ്റവും മികച്ച പതിനൊന്നംഗ ടീമിനെ ഇറക്കിയില്ലെങ്കിൽ ഇന്ത്യയോട് കാണിക്കുന്ന ബഹുമാനക്കുറവായിരിക്കുമെന്ന ഉപദേശമാണ് കെവിൻ പീറ്റേഴ്സൺ നൽകിയത്. ഓസീസിനെതിരെ ജയിക്കും പോലെ തന്നെയുള്ള വൻ ഉർജ്ജമാണ് ഇന്ത്യക്കെതിരെ ജയിച്ചാലുമെന്ന് പീറ്റേഴ്സൺ ഓർമ്മിപ്പിച്ചു.
ഓസീസിനെ തകർത്ത യുവനിരയ്ക്കൊപ്പം പരമ്പരയിൽ കളിക്കാതിരുന്ന സീനിയർ താരങ്ങളടക്കം സ്വന്തം മണ്ണിലിറങ്ങുന്ന ഇന്ത്യ അതിശക്തരാകുമെന്ന കണക്കുകൂട്ടലാണ് പീറ്റേഴ്സന്റേത്. മികച്ച ബാറ്റ്സ്മാനും ഇന്ത്യൻ മണ്ണിൽ കളിച്ച് പരിചയവുമുള്ള ജോണി ബെയർസ്റ്റോ, സാം ക്യൂറൻ, മാർക്ക് വുഡ് എന്നിവരെ ആദ്യ രണ്ടു ടെസ്റ്റിൽ പരിഗണിക്കാത്തതിനെ പീറ്റേഴ്സൺ വിമർശിച്ചു.
