ഒരു ബോളിൽ ഒരു ബാറ്റ്‌സ്മാൻ രണ്ട് തവണ റണ്ണൗട്ട്; ബിഗ് ബാഷിൽ ഉണ്ടായത് അത്യപൂർവ്വ സംഭവം; വീഡിയോ

മെൽബൺ: ആവേശകരമായ മത്സരങ്ങൾക്ക് പേരുകേട്ട ഓസ്‌ട്രേലിയൻ ലീഗാണ് ബിഗ് ബാഷ്. നിരവധി അവിശ്വസനീയമായ പ്രകടനങ്ങൾക്ക് സാക്ഷിയായ ബിഗ് ബാഷിൽ അത്യപൂർവ്വമായ ഒരു സംഭവമാണ് കഴിഞ്ഞ ദിവസം നടന്ന മത്സരത്തിൽ ഉണ്ടായത്. ഒരു ബാറ്റ്‌സ്മാൻ രണ്ട് തവണ റണ്ണൗട്ടായി, അതും ഒരു ബോളിൽ.

സിഡ്‌നി തണ്ടറും ആഡ്‌ലെയ്ഡ് സ്‌ട്രൈക്കേഴ്‌സും തമ്മിൽ നടന്ന മത്സരത്തിലാണ് സംഭവമുണ്ടായത്. അഡ്‌ലെയ്ഡ് സ്‌ട്രൈക്കേഴ്‌സിന്റെ ജെയ്ക് വെതറാൽഡാണ് അസാധാരണമായ രീതിയിൽ പുറത്തായത്. നോൺ സ്‌ട്രൈക്കേഴ്‌സ് എൻഡിലും സ്‌ട്രൈക്കേഴ്‌സ് എൻഡിലും വെതറാൽഡ് ഒരേസമയം റണ്ണൗട്ടാകുകയായിരുന്നു.

10-ാം ഓവറിന്റെ 5-ാം പന്തിലാണ് സംഭവങ്ങളുടെ തുടക്കം. ക്രിസ് ഗ്രീന്റെ പന്തിൽ സ്‌ട്രൈക്കേഴ്‌സ് എൻഡിലുണ്ടായിരുന്ന ഫിലിപ് സാൾട്ട് സ്‌ട്രെയ്റ്റ് ഡ്രൈവിന് ശ്രമിച്ചു. എന്നാൽ, ഗ്രീന്റെ കൈയ്യിൽ തട്ടിയ പന്ത് നോൺ സ്‌ട്രൈക്കേഴ്‌സ് എൻഡിലുള്ള വിക്കറ്റിൽ തട്ടി തെറിച്ചു. റൺസിനായുള്ള ശ്രമത്തിനിടെയുണ്ടായ ആശയക്കുഴപ്പം കാരണം സ്‌ട്രൈക്കേഴ്‌സ് എൻഡിലെത്താൻ വെതറാൽഡിന് കഴിഞ്ഞില്ല. അതിന് മുൻപ് തന്നെ കീപ്പർ ഡൈവ് ചെയ്ത് കുറ്റി തെറുപ്പിച്ചു.

What just happened?! Jake Weatherald somehow got run out at both ends, on the same ball! 🤯

A @KFCAustralia Bucket Moment | #BBL10 pic.twitter.com/eLRurkBQtp

— KFC Big Bash League (@BBL) January 24, 2021

റീപ്ലേ പരിശോധിച്ചപ്പോൾ നോൺ സ്‌ട്രൈക്കേഴ്‌സ് എൻഡിലുണ്ടായിരുന്ന ജെയ്ക് വെതറാൽഡ് ആദ്യം തന്നെ റണ്ണൗട്ടായിരുന്നു എന്ന് വ്യക്തമായി. പിന്നീട് റണ്ണെടുക്കാനുള്ള ശ്രമത്തിനിടെയും വെതറാൽഡ് റണ്ണൗട്ടാകുകയായിരുന്നു. മത്സരത്തിൽ അഡ്‌ലെയ്ഡ് സ്‌ട്രൈക്കേഴ്‌സിനായിരുന്നു വിജയം.