ശരീരത്തിനാവശ്യമായ കൊഴുപ്പുകളിലൊന്നാണ് ഒമേഗ 3 ഫാറ്റി ആസിഡ്. അവിശ്വസനീയമായ ഗുണഗണങ്ങളുള്ള ഇവ ശരീരത്തിനും തലച്ചോറിനും വളരെ പ്രയോജനം ചെയ്യുന്നവയാണ്. പലരും ഇവയെക്കുറിച്ച് കേട്ടിട്ടുണ്ടാവും എന്നിരുന്നാലും കൊറൊണയെ പ്രതിരോധിക്കാൻ ഒമേഗ ഫാറ്റി ആസിഡിനാകുമെന്ന പുതിയ പഠനങ്ങൾ ഏറെ പ്രതീക്ഷയുണർത്തുന്നതാണ്
രക്തത്തിൽ ഒമേഗ -3 ഫാറ്റി ആസിഡുകൾ കൂടുതലുള്ള ആളുകൾക്ക് കൊറോണ ബാധിച്ചാൽ മരണ സാധ്യത കുറയുന്നു എന്നാണ് പുതിയ റിപ്പോർട്ടുകൾ . ശരീരത്തിലെ നീർ വീക്കം, രക്തസമ്മർദ്ദം, കൊളസ്ട്രോൾ എന്നിവ കുറയ്ക്കാനും, നാഡികൾക്ക് ശക്തി നൽകാനും ഒമേഗ -3 സഹായിക്കുമെന്ന് പഠനങ്ങൾ തെളിയിച്ചിട്ടുണ്ട്.
പ്രോസ്റ്റാഗ്ലാൻഡിൻസ്, ല്യൂക്കോട്രിയൻസ്, എസൻഷ്യൽ ഫാറ്റി ആസിഡുകൾ എന്നീ ജേണലുകളിൽ പ്രസിദ്ധീകരിച്ച പഠന റിപ്പോർട്ടിൽ ഒമേഗ 3 ഫാറ്റി ആസിഡുകൾ കഴിക്കുന്നത് കൊറോണ രോഗികളിൽ മരണനിരക്ക് കുറയ്ക്കുമെന്ന് സൂചിപ്പിക്കുന്നു .
നിലവിലെ പഠനമനുസരിച്ച്, ഒമേഗ -3 സൂചിക (O3I) ഉള്ളവരിൽ കൊറോണ മരണനിരക്ക് നാലിരട്ടി കുറവാണ്. ഈ ഫാറ്റി ആസിഡുകൾക്ക് കൊറോണയുടെ സൈറ്റോകൈനിനെ നശിപ്പിക്കാൻ ശേഷിയുള്ളവയാണ് എന്നതിന് പഠനം തെളിവുകൾ നൽകുന്നുവെന്നും ഗവേഷകർ പറഞ്ഞു. കൊറോണയുമായി ബന്ധപ്പെട്ട ഒരു സങ്കീർണ്ണതയാണ് സൈറ്റോകൈൻ കൊടുങ്കാറ്റ് എന്ന പേരിൽ അറിയപ്പെടുന്നത് .
പനി, രക്തക്കുഴലുകളുടെ അമിതമായ ചോർച്ച, രക്തം കട്ടപിടിക്കൽ എന്നിവയ്ക്ക് സൈറ്റോകൈൻ കൊടുങ്കാറ്റ് കാരണമാകുന്നു. രക്തസമ്മർദ്ദം കുറയൽ, ഓക്സിജന്റെ അഭാവം, രക്തത്തിൽ അമിത അസിഡിറ്റി, ശ്വാസകോശത്തിലെ ദ്രാവകങ്ങളുടെ വർധന എന്നിവയ്ക്കും കാരണമാകുന്നു. ഇത് ശ്വാസകോശം, ഹൃദയം, കരൾ, കുടൽ, വൃക്ക, ജനനേന്ദ്രിയം എന്നിവയുടെപ്രവർത്തനത്തെ നിർജീവമാക്കുന്നു. ഇങ്ങനെ ശ്വാസകോശം പ്രവർത്തന രഹിതമാകുന്ന അവസ്ഥയാണ് അക്യൂട്ട് റെസ്പിറേറ്ററി ഡിസ്ട്രസ് സിൻഡ്രം. ശ്വാസകോശ സംബന്ധമായ തകരാറുകൾ മൂലമാണ് കൊറോണ മൂലമുള്ള മിക്ക മരണങ്ങളും.
മത്സ്യങ്ങളിലെ ഫാറ്റി ആസിഡുകൾ കൊറോണയുടെ അപകടസാധ്യത കുറയ്ക്കാൻ സഹായിക്കുമെന്നും പഠനങ്ങൾ സൂചിപ്പിക്കുന്നു. പഠനത്തിനായി, 100 കൊറോണ രോഗികളിലാണ് ഗവേഷകർ പരീക്ഷണം നടത്തിയത് .
അയല, മത്തി, കേര മീനുകളിലും ചില ഫിഷ് ഓയിൽ സപ്ലിമെന്റുകളിലും കക്കയിറച്ചിയിലും മുട്ട, ഫ്ലാക്സ് സീഡ്, വാൾനസ്, സൊയാബീൻ, ബ്രോക്കോളി, കാബേജ് തുടങ്ങിയവയിലും ഒമേഗ ഫാറ്റി ആസിഡ് ഉണ്ട് . നേരത്തേ ചൈനയിലെ ഗവേഷകരും ഗവേഷണ റിപ്പോർട്ടിൽ കൊറോണയെ പ്രതിരോധിക്കാൻ ഒമേഗക്ക് കഴിയുമെന്ന് സൂചിപ്പിച്ചിരുന്നു.
