ലണ്ടൻ: ആൻഫീൽഡിൽ ലിവർപൂളിനെ ഞെട്ടിച്ച് ബ്രൈറ്റൺ. എതിരില്ലാത്ത ഒറ്റഗോളിനാണ് നിലവിലെ ചാമ്പ്യന്മാർക്കെതിരെ ബ്രൈറ്റണിന്റെ ജയം. തീർത്തും നിറം മങ്ങിയ പ്രകടനമാണ് സ്വന്തം തട്ടകത്തിൽ ജുർഗൻ ക്ലോപ്പിനും സംഘവും കാഴ്ചവെച്ചത്. ബ്രൈറ്റണിനായി സ്റ്റീവൻ അൽസാറ്റെയാണ് രണ്ടാം പകുതിയിൽ ഗോൾ നേടിയത്. 56-ാം മിനിറ്റിൽ ഡാൻ ബേണിന്റെ ഹെഡറാണ് അൽസാറ്റെ ഗോളാക്കിയത്.
1982ന് ശേഷം ആദ്യമായാണ് ലിവർപൂളിനെ ബ്രൈറ്റൺ എവേ മത്സരത്തിൽ കീഴടക്കുന്നത്. 2017ൽ ബേൺലിയോട് തോറ്റ ശേഷം ഇതുവരെ ചെമ്പട ആൻഫീൽഡിൽ തോൽവി അറിഞ്ഞിട്ടില്ല. തോൽവി പിണഞ്ഞെങ്കിലും ലിവർപൂൾ നാലാം സ്ഥാനത്ത് തുടരുകയാണ്. കഴിഞ്ഞയാഴ്ചയിൽ ടോട്ടനത്തേയും വെസ്റ്റ് ഹാമിനേയും തോൽപ്പിച്ച് വിജയവഴിയിൽ തിരിച്ചുകയറിയ ലിവർപൂൾ ഇന്നലെ ആരാധകരെ നിരാശരാക്കി.
Comments