അഹമ്മദാബാദ്: ഇംഗ്ലണ്ടിനെതിരായ അവസാന രണ്ടു ടെസ്റ്റുകള്ക്കുള്ള ഇന്ത്യന് ടീമിനെ പ്രഖ്യാപിച്ചു. ഒരു മാറ്റം മാത്രമാണ് ടീമിലുള്ളത്. ഉമേഷ് യാദവ് ടീമിലേക്ക് മടങ്ങിയെത്തിയപ്പോൾ സാർദ്ദൂൽ താക്കൂറിനെ ഒഴിവാക്കി. പരിചയ സമ്പത്തിന്റെ അടിസ്ഥാനത്തിലാണ് ഫിറ്റ്നസ് ടെസ്റ്റ് വിജയിച്ച ഉമേഷിനെ ടീമിലേക്കെടുത്തത്. ഉടൻ തന്നെ താരം ടീമിനൊപ്പം ചേരും.
അടുത്ത രണ്ടു ടെസ്റ്റുകള്ക്കുള്ള സംഘത്തില് അഞ്ചു നെറ്റ് ബൗളര്മാരെയും രണ്ടു സ്റ്റാന്റ്ബൈ താരങ്ങളെയും ഉള്പ്പെടുത്തിയിട്ടുണ്ട്. ശര്ദ്ദുലിനെ വിജയ് ഹസാരെ ട്രോഫിക്കായി വിട്ടുകൊടുത്തിട്ടുണ്ട്. സ്റ്റാന്റ്ബൈ ലിസ്റ്റിലുണ്ടായിരുന്ന ഷഹബാസ് നദീം അഭിമന്യു ഈശ്വരന്, പ്രിയങ്ക് പഞ്ചാല് എന്നിവരെയും വിജയ് ഹസാരെ ട്രോഫിയില് കളിക്കാന് ബിസിസിഐ വിട്ടുകൊടുത്തിട്ടുണ്ട്.
ഈ മാസം 24ന് അഹമ്മദാബാദിലെ മൊട്ടേറ സ്റ്റേഡിയത്തിലാണ് മൂന്നാം ടെസ്റ്റ് ആരംഭിക്കുന്നത്. പകലും രാത്രിയുമായിട്ടാണ് ഈ മല്സരം. നാലാമത്തെയും അവസാനത്തെയും ടെസ്റ്റും ഇതേ വേദിയില് തന്നെയാണ്. മാര്ച്ച് നാലിനാണ് നാലാം ടെസ്റ്റ് ആരംഭിക്കുന്നത്.
