മുംബൈ: ഇന്ത്യൻ ക്രിക്കറ്റ് താരങ്ങൾ കൊറോണ വാക്‌സിനെടുത്തു. മുൻ ഇന്ത്യൻ നായകനും ലോകോത്തര ഓൾറൗണ്ടറുമായ കപിൽ ദേവും നിലവിലെ ഇന്ത്യൻ ടീം പരിശീലകനുമായ രവിശാസ്ത്രിയുമാണ് വാക്‌സിൻ എടുത്തത്.
കപിൽ ദേവ് ഡൽഹിയിലെ ഫോർട്ടിസ് ആശുപത്രിയിൽ നിന്നും രവിശാസ്ത്രി അഹമ്മദാ ബാദിലെ അപ്പോളോ ആശുപത്രിയിൽ നിന്നുമാണ് വാക്‌സിൻ സ്വീകരിച്ചത്. ഇരുവരും ആശുപത്രി അധികൃതർക്കും ആരോഗ്യവകുപ്പിനും ശാസ്ത്രജ്ഞർക്കും നന്ദിപറഞ്ഞു. ഒപ്പം രാജ്യം മുഴുവൻ വാക്‌സിനേഷനോട് കാണിക്കുന്ന മികച്ച പ്രതികരണത്തേയും താരങ്ങൾ അഭിനന്ദിച്ചു.
ഇന്ത്യൻ ടീം ഇംഗ്ലണ്ടുമായി നടക്കുന്ന ടെസ്റ്റ് പരമ്പര അഹമ്മദാബാദിൽ പുരോഗമിക്കുകയാണ്. നാളെ മുതൽ നാലാമത്തേതും അവസാനത്തേതുമായ ടെസ്റ്റ് നടക്കുന്നതിന് മുന്നോടി യായിട്ടാണ് പരിശീലനത്തിനിടെ രവിശാസ്ത്രി വാക്‌സിനെടുക്കാൻ സമയം കണ്ടെത്തിയത്.
