കാലാവധി തികയ്‌ക്കാതെ അധികാര വടംവലിയില്‍ കുരുങ്ങി ആര്‍ ശങ്കര്‍ പടിയിറങ്ങിയപ്പോള്‍ കേരളം വീണ്ടും രാഷ്‌ട്രപതി ഭരണത്തിലേക്ക്‌ നീങ്ങി. കുറച്ചധികം കാലം അത്‌ നീണ്ടുനിന്നു. കമ്മ്യൂണിസ്റ്റ്‌ പാര്‍ട്ടിയിലെ പിളര്‍പ്പിന്‌ ശേഷം അധികാരത്തിലെത്തിയ ഇഎംഎസ്‌ മന്ത്രിസഭയ്‌ക്കും കാലാവധി തികയ്‌ക്കാനായില്ല. മുന്നണിയിലെ ചേരിപ്പോര്‌ ഇഎംഎസിനെ പടിയിറക്കി. ഏറെ നാള്‍ കഴിയുംമുമ്പെ കേരളത്തില്‍ മറ്റൊരു തെരഞ്ഞെടുപ്പിന്‌ കേളികൊട്ടുണര്‍ന്നു. സി അച്യുതമേനോന്‍ കേരളത്തിന്റെ നാലാമത്തെ മുഖ്യമന്ത്രിയായി സത്യപ്രതിജ്ഞ ചെയ്‌തു
മുഖ്യമന്ത്രിയെന്ന നിലയില്‍ നിരവധി റെക്കോര്‍ഡുകളും അച്യുതമേനോന്‍ സ്വന്തമാക്കി. തുടര്‍ച്ചയായി ഏറ്റവും കൂടുതല്‍ കാലം കേരളത്തിന്റെ മുഖ്യമന്ത്രിയായ വ്യക്തി. 2364 ദിവസം അദ്ദേഹം മുഖ്യമന്ത്രി കസേരയിലിരുന്നു. കേരള നിയമസഭയുടെ ചരിത്രത്തില്‍ കാലാവധി പൂര്‍ത്തിയാക്കിയ ആദ്യ മുഖ്യമന്ത്രിയും അദ്ദേഹമായിരുന്നു. അടിയരാവസ്ഥയുടെ കറുത്തദിനങ്ങളില്‍ കേരളം ഭരിച്ചത്‌ അച്യുത മേനോനായിരുന്നു. കേരളത്തിലെ ആദ്യ ധനകാര്യവകുപ്പ്‌ മന്ത്രി. തുടര്‍ച്ചയായി രണ്ട് തവണ മുഖ്യമന്ത്രിയായ കേരളത്തിലെ ആദ്യ വ്യക്തിയും അച്യുതമേനോനായിരുന്നു.
ആറ്‌ പതിറ്റാണ്ട്‌ കാലം കേരള രാഷ്‌ട്രീയത്തില്‍ നിറഞ്ഞുനിന്ന അച്യുതമേനോന്‍ രാഷ്‌ട്രീയ സ്ഥിരതയാര്‍ന്ന ഭരണത്തിലൂടെ സംസ്ഥാനത്തെ വികസനത്തിന്റെ പാതയിലേക്ക്‌ നയിച്ച ഭരണതന്ത്രജ്ഞനായിരുന്നു. ഒട്ടേറെ വികസനപദ്ധതികളും അദ്ദേഹം നടപ്പിലാക്കി. 1969ലും 1970ലുമാണ്‌ അദ്ദേഹം മുഖ്യമന്ത്രിയായി സത്യപ്രതിജ്ഞ ചെയ്‌തത്‌. കമ്മ്യൂണിസ്റ്റ്‌ പാര്‍ട്ടിയുടെ സംസ്ഥാന സെക്രട്ടിയായി പലതവണ തെരഞ്ഞെടുക്കപ്പെട്ട അച്യുതമേനോന്‍ ദേശീയതലത്തിലും പ്രവര്‍ത്തിച്ചു.
അടിയന്തരാവസ്ഥ ഉണ്ടാക്കിയ മുറിവുകള്‍ അത്രപെട്ടെന്ന്‌ മറക്കാന്‍ കഴിഞ്ഞിരുന്നില്ല. എല്ലായിടത്തും കോണ്‍ഗ്രസ്‌ തകര്‍ന്നടിഞ്ഞപ്പോഴും കേരളത്തില്‍ കെ കരുണാകരന്റെ നേതൃത്വത്തില്‍ അധികാരത്തിലെത്തി. പക്ഷെ അടിയന്തരാവസ്ഥയുടെ പാപഭാരം ആദ്യ കരുണാകരന്‍ മന്ത്രിസഭയെ വിടാതെ പിന്തുടര്‍ന്നു.
