ലോക് സഭാ തെരഞ്ഞെടുപ്പിലെ ദയനീയപരാജയത്തിന്റെ ഉത്തരവാദിത്തം ഏറ്റെടുത്ത് ആന്റണി പടിയിറങ്ങുമ്പോള് പകരക്കാരനായി കോണ്ഗ്രസില് ഒരേ ഒരു പേര് മാത്രം. ഉമ്മന് ചാണ്ടി. 2004ല് ആന്റണിയില് നിന്ന് അധികാരമേറ്റെടുത്ത ഉമ്മന് ചാണ്ടിക്ക് പക്ഷെ 2006ലെ തെരഞ്ഞെടുപ്പില് ഐക്യജനാധിപത്യമുന്നണിയെ വിജയിപ്പിക്കാന് കഴിഞ്ഞില്ല. വിഎസ് പ്രഭാവം അലയടിച്ച കേരളം സഖാവിനൊപ്പം അന്ന് ഉറച്ചുനിന്നു. പിന്നീട് നേരിയ ഭൂരിപക്ഷത്തില് 2011ല് അധികാരം തിരിച്ചുപിടിച്ച് ഉമ്മന് ചാണ്ടി കാലാവധി തികച്ചു. പക്ഷെ 2016ല് തുടര്ഭരണത്തിലേക്ക് മുന്നണിയെ നയിക്കാന് ചാണ്ടിക്ക് കഴിഞ്ഞില്ല.
വിദ്യാര്ത്ഥി രാഷ്ട്രീയത്തിലൂടെ പൊതുരംഗത്തേക്ക് കടന്നുവന്ന ഉമ്മന് ചാണ്ടി 1970മുതല് തുടര്ച്ചയായി അമ്പത് വര്ഷം പുതുപ്പള്ളിയില് നിന്ന് നിയമസഭയിലേക്ക് ജയിച്ചുവരുന്നു. ഒരുപക്ഷെ മറ്റൊരാള്ക്കും സ്വന്തമാക്കാന് കഴിയാത്ത അപൂര്വ്വ റെക്കോര്ഡ്. 1977ലെ കരുണാകരന് മന്ത്രിസഭയിലും 78ലെ ആന്റണി മന്ത്രിസഭയിലും ഉമ്മന് ചാണ്ടി തൊഴില് വകുപ്പ് മന്ത്രിയായി. 81ലെ കരുണാകരന് മന്ത്രിസഭയില് ആഭ്യന്തരവകുപ്പും കൈകാര്യം ചെയ്തു. 91ല് കരുണാകരന് വീണ്ടും മുഖ്യമന്ത്രിയായപ്പോള് ധനമന്ത്രി ഉമ്മന്ചാണ്ടിയായിരുന്നു. എണ്പതുകളില് ആന്റണിയും കൂട്ടരും പിണങ്ങിപ്പോയപ്പോള് ഉമ്മന് ചാണ്ടി നിയമസഭാകക്ഷിനേതാവായി. 82ല് മുന്നണിയുടെ കണ്വീനര്സ്ഥാനവും ചാണ്ടിയെ തേടിയെത്തി. കരുണാകരന്റെ രാഷ്ട്രീയപതനത്തിന് വഴിയൊരുക്കിയതില് ഉമ്മന്ചാണ്ടിയുടെ പങ്കും വിമര്ശകര് എടുത്തുപറയുന്നുണ്ട്
പ്രീഡിഗ്രീ വിദ്യാഭ്യാസം സൗജന്യമാക്കിയതും വല്ലാര്പാടം ടെര്മിനലിന് തുടക്കമിട്ടതും കൊച്ചി മെട്രോയ്ക്കവേണ്ടി പണിയെടുത്തതും ഉമ്മന് ചാണ്ടിയുടെ നേട്ടമാണ്. ജനങ്ങളുടെ പരാതികള് നേരിട്ട് കേട്ട് ഉടന് പരിഹാരം കണ്ടെത്താന് ആരംഭിച്ച ജനസമ്പര്ക്ക പരിപാടികള് ഏറെ പ്രശംസ പിടിച്ചുപറ്റി.
2011ല് അധികാരം ഏറ്റെടുത്ത ഉമ്മന് ചാണ്ടി സര്ക്കാരിന് വളരെ വേഗത്തില് വിവാദങ്ങളും നേരിടേണ്ടിവന്നു. സോളാര് കേസിലെ പരാതിക്കാരിയുടെ കത്തില് മുഖ്യമന്ത്രിയായ ഉമ്മന് ചാണ്ടിയും ഉള്പ്പെട്ടത് കേരളരാഷ്ട്രീയത്തെ ഇളക്കിമറിച്ചു. മുഖ്യമന്ത്രിയുടെ രാജി ആവശ്യപ്പെട്ട് പ്രതിപക്ഷസംഘടനകള് നിരന്തരം തെരുവിലിറങ്ങി. ടി പി വധകേസ് എടുത്തുപറഞ്ഞ് ഭരണപക്ഷവും തിരിച്ചടിച്ചു. കണ്ണൂരിലെ കല്ലേറില് ഉമ്മന്ചാണ്ടിക്ക് പരുക്ക് പറ്റിയതും കോണ്ഗ്രസ് രാഷ്ട്രീയ ആയുധമാക്കി.
2016ലെ തെരഞ്ഞെടുപ്പ് പരാജയത്തെതുടര്ന്ന് ഉമ്മന് ചാണ്ടി ദേശീയതലത്തിലേക്ക് പ്രവേശിച്ചു. എഐസിസി സെക്രട്ടറിയായ അദ്ദേഹം ആന്ധ്രാപ്രദേശിന്റെ സംഘടനാ ചുമതല ഏറ്റെടുത്തു. ഒടുവില് 2021ലെ തെരഞ്ഞെടുപ്പ് അടുത്തപ്പോള് പാര്ട്ടിയെയും മുന്നണിയെയും നയിക്കാന് ഉമ്മന് ചാണ്ടിയെ കേരളത്തിലേക്ക് തിരിച്ചുവിളിച്ചു.
Comments